Kuri uyu wa 22 Werurwe , intumwa za Ambasade ya Swede mu Rwanda zasuye ibikorwa bitandukanye byatewe inkunga n’umushinga witwa CORE (Creating Off-Farm Rwanda Enterprise) ukorera muri World Vision igihugu cya Swede gitera Inkunga.

Ubwo basuraga imishinga itandukanye yatewe inkunga abagenerwabikorwa bagiye bagaragaza akamaro gakomeye inkunga yabamariye, bavuga ko  yagize aho ibakura n’aho ibanjyana ndetse bakaba bafite ikizere cy’uko izakomeza kubagirira umumaro mu minsi iza.

Umuyobozi w’Ishuri rya Nyakanyinya wahawe icyumba mpahabwenge kirimo zamudasobwa zifite murandasi n’ibindi bikoresho binyuranye yabwiye izi ntumwa ko banejejwe no kugira izi mashini ndetse bikaba bibafitiye umumaro ufatika kuko ubu abanyeshuri bose guhera ku mwana wiga mu mashuri abanza kugera muyisumbuye basigaye bakirigita mudasobwa. Iki kigo kandi kimwe n’ahandi hose biri hirya no hino ntibifasha abanyeshuri gusa kuko binafasha abaturage kubona gahunda zitandukanye za eta dore ko ubu ibyangombwa byinshi bisigaye bitangwa binyuze mu ikoranabuhanga.

MUKAMACONDO Lucie w’imyaka 47 avuga ko nawe yashimishijwe no kwiga ikoranabuhanga muri iki kigo kandi akaba amaze kumenya byinshi. Yagize ati: “ubu nzi gufungura imashini, nzi kwandika, nzi kujya ku mbuga bamamarizaho nka facebook ni nayo nkoresha namamaza ibyanjye. Ikoranabuhanga ryaranshimishije ku buryo mutabyumva, ati ubu hari ubwato nakoresheje nzamamaza kuri facebook, muzabubona nko mu minsi 2,…”

Nyuma yo gusura icyumba mpahabwenge cya Nyakanyinya, hasuwe ishuri ry’imyuga rya Karengera mu murenge wa Kirimbi aho batewe inkunga y’ibikoresho bikoreshwa mu kwiga ibijyanye n’ubwubatsi, ububaji, ubudozi, amashanyarazi ndetse na mudasobwa zikoreshwa mu cyumba mpahabwenge.

Hasuwe kandi ikigo cy’urubyiruko cya Nyamasheke cyatewe inkunga mu myuga itandukanye ifasha urubyiruko kwikura mu bukene harimo ibijyane no gutunganya imisatsi, ubugeni, ubudozi, …. Na none hasuwe restaurent y’urubyiruko rwishyize hamwe ruterwa inkunga y’ibioresho byo gutangiza.

Umuyobozi w’Akarere ka Nyamasheke Wungirije Ushinzwe Imari n’ Iterambere ry’Ubukungu Bwana NTAGANIRA Josoué Michel yashimiye intumwa za Ambasade, anababwira ko banejejwe n’inkunga batanze igaragaza impinduka zifatika mu mibereho y’Abaturage b’Akarere ka Nyamasheke. Yabijeje ko bazafatanya mu kurinda ibyo bahawe kugira ngo bikomeze bibagirire akamaro

Mu izina rya Ambasaderi wa Swede mu Rwanda, Umunyamabanga we wa mbere mu bujyanye n’ubukungu Madame Therese, yashimiye uburyo inkunga bateye Akarere ka Nyamasheke irigukoreshwa n’uburya yazamuye umuturage yizeza ubufatanye burambye.

Umushinga CORE wibanda ahanini guteza imbere urubyiruko n’abagore ufite igihe cy’imyaka itatu muri aka karere ukaba uzakoresha angana na miliyoni 5 z’amadorari ya Amarika mu turere twa rusizi n Nyamasheke habariwemo imirimo yose ikorwa.

 

TUYIZERE Jacques

 

 

 

Share Button