Kuri uyu wa 10 Gicurasi 2017 mu Murenge wa Mahembe hatangijwe ibikorwa by’Ubukangurambaga muri gahunda y’ubwisungane mu kwivuza “Mutuel de santé” 2017-2018.

Ubwo yatangizaga iyi gahunda, Umuyobozi w’Akarere ka Nyamasheke Bwana KAMALI Aimé Fabien yibukije abaturage ko amagara aseseka ntayorwe kandi ko umubiri ubyara udahatse bityo ko bakwiye guhora biteguye ngo batazatungurwa. Yasabye abaturage kutarindira ukwezi kwa Nyakanga kugira ngo babone gutanga umusanzu kuko bigoye kubonera icyarimwe amafaranga, abasaba gutanga make make kugira ngo ubwo umwaka uzabe utangiye bazabe bemye nta kibabuza kwivuza igihe icyo ari cyo cyose byaba ngombwa.

Yasabye abafatanyabikorwa bose barimo n’abanyamadini gufatanya n’ubuyobozi bagashishikariza abaturage kwitabira iyi gahunda nta n’umwe usigaye inyuma maze nabo biyemeza ko bazakora ibishoboka byose ku buryo nta muturage uzasigara ativuza.

Abaturage babashije gutanga imisanzu yabo mu myaka ishize batanze ubuhamya bw’uburyo bagobotswe na mituweli mu bihe bigoye baboneraho gukangura bagenzi babo ngo bayitabire.

Uyu muhango kandi witabiriwe n’ Umuyobozi w’Akarere Wngirije Ushinzwe Imibereho Myiza y’Abaturage, Umukozi w’ ikigo cy’Ubwisungane RSSB Ishami rya Nyamasheke ufite MUSA mu nshingano n’Inzego z’Umutekano.

 

 

 

TUYIZERE Jacques

Public Relations, Media and Communication Officer

Share Button