Nyamasheke: Amahugurwa y'abazahugura abandi ku ruhare rw'umuturage mu igenamigami

Kuri uyu wa 29 Nyakanga 2026 mu Karere ka Nyamasheke hasojwe amahugurwa y'iminsi ibiri yahuguye abazahugura ku igenamigambi rishingiye ku ruhare rw'abaturage. Ni amahugurwa agamije kurushaho gushimangira imiyoborere ishingiye ku bufatanye n'abaturage no gutuma ibikenewe n'abaturage biba ishingiro ry'igenamigambi n'iterambere kuva ku rwego rw'umudugudu.

Aya mahugurwa yahuje Abanyamabanga Nshingwabikorwa b'Imirenge n'abakozi b'imirenge bashinzwe gukurikirana ibikorwa by'iterambere. Yateguwe ku bufatanye bwa Minisiteri y'Ubutegetsi bw'Igihugu (MINALOC) n'Akarere ka Nyamasheke, hagamijwe kongerera ubushobozi abayitabiriye mu ishyirwa mu bikorwa ry'urwego ngenderwaho rw'igihugu rushimangira uruhare rw'abaturage mu igenamigambi ry'iterambere, guhera ku rwego rw'umudugudu.

Asoza ku mugaragaro aya mahugurwa mu izina ry'Akarere ka Nyamasheke, Umunyamabanga Nshingwabikorwa w'Akarere, Bwana Muneza Placide, yashimiye MINALOC ku gikorwa cyubaka imiyoborere ishyira umuturage ku isonga mu igenamigambi ry'iterambere. Yagaragaje ko guha abaturage ijambo mu gutegura ibikorwa bibareba bituma hagaragazwa ibyihutirwa bikenewe, bikanaba umusingi w'iterambere rirambye, rirangwa no gukorera mu mucyo no kubazwa inshingano.

Abahuguwe ku rwego rw'Akarere bazahugura abayobozi bo ku rwego rw'Akagari, na bo bazahugure abayobozi b'Imidugudu. Biteganyijwe ko ubu buryo buzafasha abayobozi b'inzego z'ibanze kunguka ubumenyi n'ubushobozi bwo gufasha abaturage kugira uruhare rugaragara mu kugaragaza ibibazo bafite, gushyira imbere iby'ingenzi no gutegura ibikorwa by'iterambere bishingiye ku byo bakeneye.

Binyuze muri iki gikorwa, Akarere ka Nyamasheke gakomeje gushimangira imiyoborere idaheza, ishyira abaturage ku isonga mu ifatwa ry'ibyemezo no mu igenamigambi ry'iterambere, hagamijwe ko buri muturage agira uruhare rufatika mu kubaka no guteza imbere aho atuye.