Kuri uyu wa 21 Gicurasi 2026 ba Mutimawurugo b'Akarere ka Nyamasheke bari kumwe n'Umuyobozi w'AKARERE ka Nyamasheke Bwana Mupenzi Narcisse, Umuyobozi w'Akarere wungirije ushinzwe imibereho myiza Madamu Mukankusi Athanasie, Umuyobozi Mukuru ushinzwe imirimo rusange Madamu Uwimpuhwe Florentine n'abagize Komite y'umutekano y'Akarere itaguye, basuye urugo rw'Impinganzima ho mu karere ka Rusizi, baganira n'Intwaza zo muri uru rugo kandi bazishyikiriza impano zinyuranye. 

Mu rugo rw'impinganzima abashyitsi baturutse mu karere ka Nyamasheke bakiriwe n'umuyobozi w'Akarere ka Rusizi wungirije ushinzwe imibereho myiza Madamu Mukakarisa Francine ari kumwe n'Intwanza zituye muri uru rugo n'abakozi bafasha Intwaza mu buzima bwa buri munsi. 

Mu butumwa bwatanzwe hasobanuwe ko uruzinduko rwa ba Mutimawurugo bo mu karere ka Nyamasheke rugamije kwegera abatuye mu rugo rw'Impinganzima cyane cyane muri ibi bihe by'iminsi 100 u Rwanda ruri kwibuka ku nshuro ya 32 Jenoside yakorewe Abatutsi mu 1994, gukomeza kuberaka urukundo, kubahumuriza no kubabwira ko ba Mutimawurugo b'Akarere ka Nyamasheke n'abayobozi muri rusange babazirikana nk'ababyeyi babo, kandi bakabafataho urugero rwiza mu kubaka igihugu kizira ingengabitekerezo ya Jenoside n'andi macakubiri yagejeje u Rwanda kuri Jenoside yakorewe Abatutsi. 

Intwaza zagaragarijwe ko u Rwanda rufite ubuyobozi bwiza bukunda abanyarwanda, hashimwa kandi izahoze ari ingabo za RPA zahagaritse Jenoside zirangajwe imbere na Nyakubahwa Perezida wa Repubulika Paul Kagame, akaba ari nawe warashyizeho icyerekezo gitanga icyizere ku banyarwanda n'abandi bose basura u Rwanda n'isnhuti zarwo. 

Umuhuzabikorwa w'Inama y'Igihugu y'Abagore Madamu Mukakabogora Anasithasie agaruka kuri uru rugendo rwateguwe na ba Mutimawurugo ba Nyamasheke yagize ati: “Twaje hano kubera urukundo, twaje hano kugira ngo tugaragariza aba babyeyi ko duhagaze mu cyuho cy'ababo babuze, kandi tukababwira ko Jenoside itazongera kubaho ukundi. Dufite imbaraga, dufite imiyoborere myiza irangajwe imbere na Nyakubahwa Perezida wa Repubulika Paul Kagame. Jenoside yahagaritse n'Inkotanyi, natwe ubu turi inkotanye kandi turakotana kugira ngo Jenoside itazongera kubaho ukundi.” 

Urugo rw'Impinganzima rwa Rusizi ruherereye mu murenge wa Kamembe, Akagari ka Cyangugu mu mudugudu w'Intwari, rukaba rutuwemo n'intwaza zigera kuri 45. 

Ubuyobozi bw'Akarere bwifatanyije na ba Mutimawurugo mu rugendo rwo gusura IntwazaBa Mutimawurugo batuye Intwaza impano zinyuranye