Kuri uyu wa 23 Gashyantare 2026, mu Karere ka Nyamasheke hatangijwe Icyumweru cy’Umujyanama ku nsanganyamatsiko igira iti: “Serivisi Inoze Isôoko y’Iterambere n’Imibereho Myiza by’Umuturage.”

Iki ni igikorwa ngarukamwaka gitegurwa na Njyanama y’Akarere ka Nyamasheke kigamije kurushaho kwegera abaturage, kumva ibitekerezo byabo no kuganira n’inzego z’ibanze ku ngingo zitandukanye zifasha mu kunoza imitangire ya serivisi no kwihutisha iterambere. Muri iki cyumweru, abajyanama bazasura imirenge itandukanye baganira ku bikorwa n’ingamba zishingiye ku nkingi eshatu za Guverinoma: imiyoborere myiza, iterambere ry’ubukungu n’imibereho myiza y’abaturage.

Ku munsi wa mbere, abajyanama bigabanyijemo amatsinda atatu asura imirenge ya Karengera, Nyabitekeri na Cyato. Muri iyi mirenge, bagiranye ibiganiro n’inzego z’ibanze byibanze ku mitangire ya serivisi, imikorere y’inzego z’ubuyobozi ndetse n’uruhare abaturage bagira mu gushyira mu bikorwa gahunda za Leta.

Mu Murenge wa Karengera, nyuma y’ibiganiro n’abayobozi b’inzego z’ibanze, abajyanama bahuye n’abaturage mu nama rusange. Ibiganiro byibanze kuri gahunda zitandukanye zirimo Ejo Heza, ubwisungane mu kwivuza, gahunda yo kugaburira abana ku ishuri (School Feeding), kurwanya amakimbirane mu miryango, kwirinda inzoga zitujuje ubuziranenge no kwitabira gahunda zitandukanye zigamije gukura abaturage mu bukene.

Perezida wa Njyanama y’Akarere, Prof. Kamana Emmanuel, yashishikarije abaturage kwitabira izi gahunda kuko ari zo musingi w’iterambere rirambye n’imibereho myiza. Mu butumwa bwe yagize ati: “Tuba twaje kuganira namwe kuri gahunda za Leta kandi tubasaba kuzitabira. Ariko tunabashishikariza kwicungira umutekano kuko nta mutekano nta buzima. Mwirinde amakimbirane mu miryango, mube mu mudugudu uzira icyaha.”

Nyuma y’ubutumwa bw’abayobozi, abaturage bahawe umwanya wo gutanga ibitekerezo no kubaza ibibazo. Mu byagarutsweho harimo ibijyanye na VUP, ikibazo gishingiye kuri gahunda ya Girinka, gushima ibikorwa remezo by’amashanyarazi byageze mu murenge, ariko basaba ubuvugizi ku kibazo cy’umuhanda utagendeka, impungenge ku kwiyongera kw'umusanzu w'ubwisungane mu kwivuza no gusaba amakuru kuri icyo kibazo n'ibindi. Abajyanama bafatanyije n'umurenge basubije ibibazo byabajijwe, basaba ko umurenge wakomeza gukurikirana ibitahise bibona ibisubizo harimo n'ibyo umurenge uzafashwamo n'Akarere.  

Abajyanama ubwo biteguraga kwerekeza mu mirenge itandukanye guhura n'inzego z'ibanze n'abaturage

Abajyanama RUGIRA Amandin Jean Paul, BIKORIMANA François, MUKANTAGUNGIRA Jeannette, Prof. KAMANA Emmanuel, MUKAMAZIMPAKA Charlotte, RENZAHO Giovanni (uhereye iburyo)

Perezida wa Jyanama Prof. Kamana Emmanuel