Hirya no hino mu mirenge hubatswe amazu 70 yagenewe Abarokotse Jenoside yakorewe abatutsi batishoboye muri uyu mwaka wa 2018-2019 mu rwego rwo kurushaho kubatuza neza.

Bamwe mu baturage twaganiriye nabo batujwe kuri site ya Mataba mu Murenge wa Shangi baragaragaza ibyishimo bafite byo gutuzwa heza bavanywe hirya no hino mu tugari two muri uyu Murenge aho bavuga ko hatari hameze neza ariko kuri ubu bakaba batekanye rwose.

Bakaba babishima ubuyobozi bwiza hanwe na  Nyakubahwa perezida wa Repuburika ndetse n’ubuyobozi bw’Akarere ka Nyamasheke bwababaye hafi bukabaha aya mazu.

Nyirahabimana Berthilide wari utuye mu kagali ka Mugera, avugako yabaga mu nzu yari yarubakiwe mu 1996, amabati akaba yarashaje kandi iva.

 Ati “kubera ibyishimo byinshi sinabona uko nabivuga, sinabona uko nabirondora! Nabanje kwemezwa mu baherukaga kubakirwa ariko barebye kuri raporo yo muri 2011 basanga ntariho, none ubu narubakiwe ndi hano.”

Uwangundi Costasie, nawe ukomoka muri Mugera avugako yari atuye ahantu habi, mu nzu yari yarubakiwe jenoside irangiye, aho imvura yagwaga bakanyagirwa.

 Ashimira perezida wabahaye inzu igizwe n’ibyumba bibiri na saro, akanabaha matora ebyiri bakaba bafite aho baryama, akaba ashimira n’abubatsi bubatse aya mazu ko bayubatse neza.

Nsengiyumva Vincent yagize ati “banyubakiye inzu mu 1995 yari yarashaje none reta inyitayeho ibonako ndakwiye gusaza nabi, sinigeze ntura mu nzu y’amatafari none ubu nyituyemo ndetse nkingisha metariki.

 Ni ibyisimo birenze kubona bagiye kunsazisha neza, iri akaba ari ishema rya nyakubahwa perezida wa Repubirika Paul Kagame, ndetse n’ubuyobozi bafatanyije”.

Akomeza avugako ari byiza kuba bavuye mu manegeka bakaba batujwe hamwe kandi ko bizabafasha no kugera ku rindi terambere, ndetse ngo bakaba bagomba kugira imihigo yo kubungabunga ibyiza ubuyobozi bubagejejeho, n’abazabakomokaho bikazabagirira akamaro.

Aya mazu yose buri imwe igizwe n’icyumba cy’uruganiriro, ibyumba bibiri byo kuryamamo, igikoni , ubwiherero, ubwogero ndetse n’ikigega gifata amazi.

Yakira itsinda ryaturutse mu Kigo k’ Igihugu cy’ Ibarurishamibare (NISR) kuri uyu wa 08/Nyakanga/2019, Umuyobozi w’Akarere ka Nyamasheke KAMALI Aimé Fabien, yavuze ko aya mazu yubatswe yari umwe mu muhigo y’Akarere, bakaba barawuhiguye ijana ku ijana. Akomeza avugako bitararangira kuko bagikomeje kubaka ubushobozi ngo bubake n’andi mazu kugirango abaturage bature heza.