Mu nama y'inteko rusange isanzwe y'ihuriro JADF Jyambere Nyamasheke, abafatanyabikorwa b'akarere baganiriye ku imurikabikorwa n'imurikagurisha biteganyijwe guhera ku wa 25-31 Kanama 2025. Iri murikabikorwa rizakorerwa ku Kibuga cya Kirambo aho abafatanyabikorwa bazagaragariza abaryitabiriye ibyo bafatanya n'akarere mu iterambere n'imibereho myiza y'umuturage. 

Ku bijyanye n'imurikabikorwa, rizatangira ku wa 25-27 Kanama 2025, abafatanyabikorwa b'akarere bibumbiye mu ihuriro JADF Jyambere Nyamasheke bazamurikira abaryitabiriye ibikorwa bitandukanye bafatanyamo  n'akarere ka Nyamasheke mu iterambere n'imibereho myiza y'abaturage. 

Igikorwa cy'imurikagurisha giteganyijwe guhera ku wa 28-31 Kanama 2025, kizakorwa ku bufatanye bw'abikorera (PSF), ihuriro JADF Jyambere Nyamasheke, Yirunga LTD itegura ‘Kivu Beach Festival’ n'abandi bafatanyabikorwa. Muri iri murikagurisha na ryo rizabera ku kibuga cya Kirambo hazahurira abikorera bazamurika ibikorwa bitandukanye birimo "made in Rwanda", ibishingiye ku buhinzi n'ubworozi, uburobyi, ubukorikori n'ibindi. 

Biteganyijwe ko abitabiriye ibi bikorwa kandi bazasusurutswa n'abahanzi batandukanye bazitabira iri murikagurisha ku kibuga cya Kirambo, nyuma ya kirambo mu masaha ya nimugoroba abitabiriye ibyo bikorwa by'imurikabikorwa n'imurikagurisha bakazajya bitabira ibindi bikorwa bishingiye ku bukerarugendo bwo mu mazi byateguwe na Yirunga LTD ibizwi nka 'Kivu Beach Festival' bizajya bibera kuri 'Shara Beach.' Bimwe mu bikorwa bizajya bikorerwa kuri ‘Shara Beach’ harimo gusiganwa mu bwato, gutembera ku birwa biri mu kiyaga cya Kivu, imikino nka Beach Volleyball n'ibindi. 

Abagize ihuriro JADF Jyambere Nyamasheke, urugaga rw'abikorera mu karere 'PSF' na Yirunga LTD biyemeje gukorera hamwe mu itegurwa ry'ibyo bikorwa kandi biyemeza kubimenyekanisha no kuzabyitabira.