Kuri uyu wa 30 Werurwe 2021, habaye igikorwa cyo gushyikiriza telefone ngendanwa zigezweho (Smart phones) abagore bakora umwuga w’ubuhinzi n’ubworozi mu turere dutandukanye mu turere twa Nyamagabe, Burera, Kirehe na Nyamasheke. Abagore bashyikirijwe telefoni ni abafashamyumvire bibumbiye mu makoperative y’ubuhinzi mu gihugu aho bashyikirijwe telefoni zigezweho (smart phone) binyuze mu bukangurambaga bwa #ConnectRwanda.

Aba bagore batoranyijwe hashingiwe ku ruhare bagira mu gukangurira abahinzi kwifashisha uburyo bugezweho bwo guteza imbere ubuhinzi. Mu Karere ka Nyamasheke hakaba hatanzwe telephone 163. Imibare itangwa na Minisiteri y’Ubuhinzi n’Ubworozi igaragaza ko umufashamyumvire mu buhinzi umwe afasha abahinzi 4,000. Izi telefoni zigezweho zizaborohereza kubona amakuru yerekeye ubuhinzi no kuyageza ku bahinzi bagenzi babo. Muri ayo makuru harimo ay’iteganyagihe, ayerekeye amasoko y’umusaruro wabo n’ay’uburyo bugezweho mu kunoza ubuhinzi.

Umuyobozi w’ Akarere Mukamasabo Appolonie yagarutse ku ruhare rw’ Umugore mu Iterambere ry’ Umuryago agaragaza ko umugore ari inking ya mwamba ndetse agaruka kuri gahuda nyinshi bafatanyamo n’ abagore kandi zagiye zigaragaza impinduka ku mibereho myiza y’ abaturage.

Yashimiye uuyobozi bukuru bw’ Igihugu kubera iyi gahunda nziza bagejeje ku mugore w’ umuhinzi, asaba abahawe telephone kuzifata neza no kuzibyaza umusaruro bazitezeho

Mu ijambo rye kuri iki gikorwa, Nyakubahwa Paula Ingabire; Minisitiri w’Ikoranabuhanga mu Itumanaho no Guhanga Ibishya yagize ati: “Ubuhinzi n’ubworozi n’inkingi ya mwamba ku bukungu bw’igihugu cyacu. Kwifashisha ikoronabuhanga mu buhinzi n’ubworozi byongera umusaruro, bikongera agaciro, n’amasoko; bityo bigafasha kuzamura ubukungu bw’igihugu. Abagore bari hejuru ya 60% w’abakora ubuhinzi n’ubworozi, bityo kubaha telefoni ngendanwa zigezweho (smartphones) biduha icyizere ko umusaruro batangaga ugiye kwiyongera. Turashimira abafatanyabikorwa muri rusange dukomeje gufatanya muri iyi gahunda”.

Mu buhamya bw’ umwe mu bagore bahawe izi telephone Nyiraneza Adrie yagaragaje amarangamutima ye ashimira Umukuru w’ Igihugu udahwema kubatekerezaho no kubashakira iterambere maze avuga koizi telephone bazazikoresha mu kurushaho kunoza ibyo bakora harimo guhanahana amakuru, gushaka amasoko y’ umusaruro n’ ibindi.

Ubukangurambaga bwa #ConnectRwanda bwatangijwe na MTN Rwanda ku bufatanye na Minisiteri y’Ikoranabuhanga mu Itumanaho no Guhanga Ibishya mu Ukuboza 2019 hagamijwe kugenera abaturarwanda telefoni ngendanwa zigezweho mu rwego rwo kwihutisha iterambere ry’ubukungu bushingiye ku ikoranabuhanga. Ubu bukangurambaga bukorwa mu buryo ibigo byigenga, inzego za Leta n’abantu ku giti cyabo bitanga kugira ngo intego yo kugeza iri koranabuhanga ku banyarwanda bose.