Kuva ishuri rya Gisakura ryashingwa mu mwaka wa 1974, bari batarabona amazi meza ya robine kugeza ku wa 14 Gashyantare 2024, ubwo iki kibazo cyahindutse amateka ubwo bagezwagaho amazi meza akomoka kuri gahunda y’ Ikigo Gishinzwe Iterambere ry’ Igihugu, RDB yatwaye hafi miliyoni 95 z’ amafaranga y’ u Rwanda.

Abanyeshuri bo kuri iri shuri bavuga ko kubona amazi meza byabagoraga bikabasaba gukora urugendo rurerure bikanabangamira amasomo, bakavuga ko aya mazi aje ari igisubizo.

Izabakuza Pascal wiga mu mwaka 5 kuri iki Kigo ati “ Kubona amazi meza ntibyari byoroshye, byabaga ngombwa ko umuntu azana agakoresho k’ amazi akuye mu rugo, cyangwa bigafata urugendo nk’ urw’ ibirometero 2 ngo abone amazi meza, kdi hano ni mu misozi, kuboana amazi ntibyoroshye

Pascal akomeza Ashima ko RDB ibavunnye amaguru kuko bizabafasha kwita ku masomo mu buryo bworoshye. Ati : RDB irakoze rwose barakoze baraturuhuye ndetse n’ imyigire yacu igiye kurushaho kuba myiza kuko nko mu gihe cy’ izuba byagoranaga cyane kubera ko nta mazi y’ imvura aba aboneka, wasangaga kugira ngo abanyeshuri bakore isuku bibasaba gufata imisozi bikagorana, turabizeza ko aya mazi tuzayacungira umutekano.

Ibi Pascal abihuriraho na mugenzi we witwa Kampire Francine na we wiga kuri iri shuri uvuga ko bagorwaga n’ urugendo bakoraga kugira ngo babone amazi meza.

Aragira ati “ ikibazo cy’ amazi cyari kitugoye nk’ abanyeshuri, iyo twakeneraga amazi twajyaga mu mibande kdi na bwo ugasanga Atari amazi meza. Nko mu gihe tumaze Gufata amafunguro, kugira ngo twose ibyo twaririryeho byadusabaga urugendo …… ubu twabinye amazi meza turishimye, turashimira RBD kuko badukuye kure cyane, bizaturinda ingendo twakoraga tujya gushaka amazi, maze icyo gihe twakoreshaga tugikoreshe twita ku masomo ariko azanadufasha kugira ubuzima bwiza kuko afite isuku kdi yujuje ubuziranenge.

Umuyobozi Ushinzwe Guhuza Pariki n’ Abaturage muri RDB Mbabazi Marie Louise avuga ko iyi ari gahunda Leta y’ u Rwanda yafashe kugira ngo abaturiye Pariki babone ibyiza by’ ubukerarugendo by’ umwihariko ibikomoka kuri Pariki maze na bo barusheho kugira uruhare mu kuzibungabunga no kuzirinda ba rushimusi.

Ati “ mbere abaturiye pariki barazononaga batazi akamaro kazo kuko bazihigagamo, bagatemamo ibiti, ariko ubu barakumiriwe, amafaranga avamo tububakiramo ibindi bashaka byabafasha kwiteza imbere noneho na bo bakadufasha kubungabunga Pariki no kurwanya ba rushimusi.

Umuyobozi w’ Imirimo Rusange mu Karere ka Nyamasheke RUTIKANGA Joseph wari uhagarariye ubuyobozi bw’ Akarere yagaragaje ko iki gikorwa ari ingenzi kandi ko ari kimwe muri byinshi bafatanyamo na RDB muri iyi gahunda ndetse avuga ko ubu uyu muyoboro Ugiye mu biganza by’ Akarere ko uzakomeza gucungwa neza kugira ngo ubyare umusaruro witezweho.

Usibye aba banyeshuri uyu muyoboro ugezaho amazi, uzanafasha abaturage baturiye iri shuri na bo kugera ku mazi meza.

Muri iyi gahunda yo gusaranganya umusaruro ukomoka muri Pariki hakorwa ibikorwa bitandukanye bigamije kuzamura imibereho myiza y’ umuturage no kubyibonamo. Hakorwa ibikorwa birimo kubaka imihanda, amavuriro, ibyumba by’ amashuri, kubakira abatishoboye,..

Muri uyu mwaka , ibi bikorwa byose bizatwara Frw asaga miliyari 3 mu Gihugo hose.