Ku bufatanye n’Umuryango Mpuzamahanga “Compassion International”, mu karere ka Nyamasheke horojwe abagenerwabikorwa b’uyu mushinga.

Nk’uko byasobanuwe na Pasteur RURANGWA Sylvain wari uhagarariye Umuyobozi Mukuru utabashije kuboneka, compassion yatanze inka zisaga 116 mu Karere ka Nyamasheke ndetse inatanga ihene zisaga 636 ku miryango ifite abana b’ abagenerwabikorwa b’umushinga batoranywa hakurikijwe abakennye kurusha abandi bo mu kiciro cya mbere n’icya kabiri cy’ubudehe. Kuri iyi ncuro horojwe imiryango 42 y’Abana baba mu mushinga wa Ntendezi ho mu Murenge wa Ruharambuga, izindi zikaba zaratanzwe mbere. Yakomeje avuga ko Compassion yatekereje gahunda ya Girinka nyuma y’aho Umukuru w’Igihugu ayitangije kandi ibi bikiyongera ku zindi gahunda zitandukanye zirimo uburezi, ubuvuzi, Imibanire n’abandi aho baha abana uburyo n’ibikoresho byo kwidagadura, ubukungu n’imibereho myiza. Yaboneyeho kandi gushimira Ubuyobozi bw’Akarere ka Nyamasheke kubera imikoranire myiza hagati y’Akarere n’Ubuyobozi bw’Amatorero afite imishinga y Compassion International kuko biborohereza mu mikoranire. Yibukije ababyeyi kurera abana neza bagakura neza muburyo bwose ndetse bakagira umutima wo korozanya kugira ngo gahunda ya Girinka yagera kuri bose. Yabifurije gutera imbere bakava mu cyiciri barimo bakajya mu kindi bityo bagaha umwanya n’abandi mu mushinga. Yagarutse ku ntumbero y’Umuyobozi w’Umushinga ku rwego rw’Isi ko bifuza ko umunsi umwe umwana umwe mu bafashwa na Compassion azaba perezida w’Igihugu yungamo ko yanavuka I Nyamasheke.

UZAMUKUNDA Felicitée wo mu kagari ka Ntadezi ko Mu Murenge wa Ruharambuga yashimiye leta y’u Rwanda n’Umushinga ko umworoje. Yagize ati “ biranejeje cyane kubera ko ari igitangaza kuko ari bwo bwa mbere ngiye korora inka, izamfasha kwivana mu bukene, nta mata naywaga, nta gafumbire bityo singire umusaruro uhagije.”

Mu izina ry’Umuyobozi w’Akarere ka Nyamasheke, Umunyamabanga Nshingwabikorwa w’Agateganyo w’Akarere ka Nyamasheke Bwana NIYIBIZI NTABYERA Hubert, yashimiye Ubuyobozi bw’Umushinga kubera uruhare ntagereranywa bagaragaza mu kwese imihigo y’Akarere igamije guteza imbere Umunyarwanda n’Umuturage w’Akarere ka Nyamasheke by’umwihariko. Yanijeje kandi Ababanyamadini n’Amatorero ari nayo Umushinga wahisemo gukorana nabo, ko bazakomeza gufatanya kugira ngo bagere ku iterambere rirambye. Yibukije ko ibi byose babikesha Ubuyobozi bwiza n’umutekano anabasaba kuwubungabunga kugira ngo bitazabaza mu myanya y’intoki.

Umunyamabanga Nshingwabikorwa w’Agateganyo w’Akarere ka Nyamasheke Bwana NIYIBIZI NTABYERA Hubert Yibukije imiryango yorojwe ko bakwiye kugira umutima wo kwitura uwabaganiye  nabo bagabira abandi bityo ntihazagire Umunyarwanda usigara atanywa amata. Yabasabye kandi kuzifata neza.

Umuryango Compassion Itenational watangiriye mu gihugu cya  Koreya mu mwaka wa 1952. ukorera mu bihugo 28 ku isi yose birimo 8 bya Afurika. ukaba warageze mu Rwanda  mu mwaka wa 1982, ukaba ufasha abantu batishoboye kwigobotora ingoyi y’ubukene. Aho utangiriye iyi gahunda ya Girinka ukaba umaze koroza abasaga 10000 kandi ukaba ugikomeje

TUYIZERE Jacques

Public Relations, Media and CommunicationOfficer