Mu rugamba rw'iterambere ry'akarere ka Nyamasheke, ku wa 29 Mutarama 2026 hateranye inteko y'ishoramari hareberwa hamwe amahirwe y'ishoramari mu karere ka Nyamasheke n'uko yabyazwa umusaruro. 

Iyi nteko yitabiriwe na Guverineri w'Intara y'Iburengerazuba Bwana Ntibitura Jean Bosco wari kumwe n'abandi bayobozi batandukanye, abashoramari n'abafatanyabikorwa banyuranye b'akarere. Iki gikorwa cyabimburiwe n'urugendo rwo gusura hamwe mu hari amahirwe y'ishoramari mu karere hibandwa ku mahirwe y'ishoramari ari mu kiyaga cya Kivu no mu nkengero zacyo.

Nyuma yo gusura aho hantu hanyuranye haberanye n'ishoramari, hatanzwe ibiganiro bigaruka ku miterere y'ishoramari mu Rwanda, n'icyo Leta y'u Rwanda ifasha abashoramari binyuze mu kigo cy'igihugu cy'iterambere (RDB) hagaragazwa ko abashoramari bashonje bahishiwe cyane cyane ku bijyanye no koroshya uburyo bwo kubona serivisi zijyanye n'ibyangombwa ku bashoramari bashya ndetse n'abasanzwe, aho bazajya babona serivisi bitabasabye kuva aho bari binyuze mu buryo bw'ikoranabuhanga.

Harebwa by'umwihariko ibijyanye n'iterambere ry'ishoramari mu karere ka Nyamasheke, ubuyobozi bw'akarere bwagaragaje amahirwe ari mu karere binyuze muri filime mbarankuru yari yateguwe, hagaragazwa ko amahirwe ari menshi ku bashoramari kandi n'akarere kakaba kiteguye kubafasha no gukorana nabo.

N'ubwo akarere gahamagarira abashoramari kugana Nyamasheke bakahashora imari, mu bitekerezo byatanzwe hagarutswe ku bashoramari baguze ubutaka muri Nyamasheke ariko bukaba bumaze igihe kinini nta bikorwa remezo burashyirwaho, bigaragazwa nk'ikibazo kibangamira iterambere ry'akarere kuko usanga akenshi abagura ubutaka baba batagamije kubushyiraho inyubako n'ibindi bikorwa byagenwe kubukorerwaho, ahubwo ugasanga bagamije kuzongera kubugurisha ku giciro gihanitse. Ubuyobozi bw'akarere bwagaragaje ko ibi bigira ingaruka ku biciro by'ubutaka aho usanga bizamuka mu buryo budakwiye kubera abantu babugura kuri izo mpamvu zavuzwe hejuru. 

Mu rwego rwo gushakira umuti urambye w'iki kibazo, ubuyobozi bw'akere bwamaze impungenge abitabiriye ihuriro ku ishoramari buvuga ko hari gutegurwa inama n'abo bashoramari bose baguze ubutaka mu karere bakaba batarabukoreraho ibikorwa bwagenewe ndetse n'abandi bose bafite ibibanza bitariho ibikorwa byagenewe gukorerwaho.

Ikindi ubuyobozi bw'akarere bwijeje nyuma yo kubona igishushanyo mbonera cy'imikoreshereze y'ubutaka ni ukwihutisha igaragazwa ry'amakuru ku byagenewe gukorerwa muri buri gace bityo bikazafasha kwihutisha ishoramari mu karere n'iyubakwa ry'ibikorwa remezo muri rusange.