Kuri uyu wa 13 Ugushyingo 2025, Umuyobozi w’Akarere ka Nyamasheke Bwana Mupenzi Narcisse yakiriye ku biro by’Akarere Ambasaderi wa Repubulika ya Zimbabwe mu Rwanda, Nyakubahwa Prof. Charity Manyeruke, watangiye uruzinduko rw'akazi rw’iminsi ibiri rugamije kuganira n’ubuyobozi bw’Akarere ku mahirwe y’ubucuruzi n’ishoramari ashobora gutezwa imbere hagati y’impande zombi.

Akigera mu Karere, Ambasaderi Manyeruke yakiriwe n’ubuyobozi bw’Akarere ka Nyamasheke aho bagiranye ibiganiro byibanze ku mahirwe y'ishoramari n'ubucuruzi biri mu karere ka Nyamasheke.

Bitaganyijwe ko muri uru ruzinduko Ambasaderi asura ibikorwa bitandukanye birimo Uruganda rw’Icyayi rwa Gatare ruherereye mu Murenge wa Karambi, kimwe mu bigaragaza amahirwe y’ishoramari mu Karere ka Nyamasheke, ndetse ku munsi wa kabiri w'uruzinduko akazasura Nyungwe Management Company, ifite uruhare rukomeye mu guteza imbere ubukerarugendo bushingiye ku bidukikije n’ubukungu bushingiye ku kubungabunga umutungo kamere.

Ku munsi wa kabiri w’uruzinduko, kuwa 14 Ugushyingo 2025, Ambasaderi azasura Ikigo cy'ishuri nderabarezi cya TTC Mwezi, aho azahura n’abarimu bo muri Zimbabwe bakorera muri iki kigo ndetse n’imiryango yabo. Uyu munsi uzaba ari n’amahirwe yo kuganira ku buryo ubufatanye mu burezi bushobora kurushaho gukomeza gufasha mu kubaka ubushobozi bw’abarezi b’ejo hazaza.