Mu gitondo cy’uyu wa kabiri tariki ya 13 Mutarama 2026, Umuyobozi w’Akarere ka Nyamasheke, Bwana Mupenzi Narcisse, yakiriye itsinda rya “Taskforce” y’Igihugu rishinzwe gukurikirana ibibazo bibangamiye abaturage (National Human Security Issues), riyobowe na Col. Nyirasafari Seraphine. Uru ruzinduko rwari mu rwego rw’igenzura rigamije kureba uko Akarere ka Nyamasheke gashyira mu bikorwa ingamba zo gukemura ibibazo bibangamiye abaturage.

Nyuma y’ikaze no kumenyana, ubuyobozi bw’Akarere bwatanze ishusho rusange y’ibikorwa byagiye byakozwe bigamije gukemura ibibazo bibangamiye abaturage, bugaragaza intambwe imaze guterwa binyuze mu bufatanye n’abafatanyabikorwa batandukanye. Ubuyobozi bw'Akarere bwagaragaje ko n’ubwo hari byinshi byagezweho, hari n’imbogamizi zigihari, cyane cyane izishingiye ku ngengo y’imari idahagije.

Muri ibyo bibazo byagarutsweho, harimo icy'abaturage usanga badafite ubutaka bwo guturaho, aho kubafasha bisaba ingamba zihariye zirimo kubagurira ubutaka bwo kububakiraho, ndetse n’ibindi bibazo bifite aho bihuriye n’imibereho rusange y’abaturage.

Nyumayo kugaragaza ibyakozwe n’ibikiri ingorabahizi, hakurikiyeho umwanya wo kungurana ibitekerezo, kubaza no gusubiza ibibazo ku ngingo zitandukanye hagamijwe gushakira hamwe ibisubizo birambye. 

Iki gikorwa cyasojwe n’uruzinduko rwakozwe n’itsinda ry’Igihugu rifatanyije n’Umuyobozi w’Akarere wungirije ushinzwe Imibereho Myiza y’Abaturage, Madamu Mukankusi Athanasie, berekeza mu Murenge wa Cyato, aho bagiye kwirebera imbonankubone bimwe mu bikorwa byagezweho mu gukemura ibibazo bibangamiye abaturage.