Kimwe n’ahandi mu turere dutandukanye tw’Igihugu, kuri uyu wa 13 Mutarama 2026, mu Karere ka Nyamasheke hatangijwe ku mugaragaro Urugerero rw’Inkomezabigwi icyiciro cya 13. Iki gikorwa ku rwego rw’Akarere cyabereye mu murenge wa Kagano, Akagari ka Rwesero, cyitabiriwe n’abayobozi batandukanye n’urubyiruko rwitabiriye iyi gahunda y’igihugu.

Uyu muhango wari witabiriwe n’Umuyobozi w’Akarere wungirije ushinzwe Iterambere ry’Ubukungu, Bwana Muhayeyezu Joseph Désiré, ari kumwe na Madamu Uwera Kayumba Marie Alice, Umuyobozi Nshingwabikorwa w’Ishami ry’Ubumwe n’Ubudaheranwa muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), akaba yari umushyitsi mukuru muri iki gikorwa.

Mu ijambo rye, Madamu Uwera Kayumba Marie Alice yashimiye byimazeyo urubyiruko rwemeye kwitabira gahunda y’Urugerero rw’Inkomezabigwi, anashimira ababyeyi n’imiryango yabohereje, abizeza ko Minisiteri y’Ubumwe bw’Abanyarwanda n’Inshingano Mboneragihugu, ifatanyije n’izindi nzego zitandukanye, izakomeza gutoza urubyiruko umuco w’ubukorerabushake, ubwitange, gukunda igihugu no kugiteza imbere, binyuze mu Rugerero no mu zindi gahunda zinyuranye zigamije kubaka Umunyarwanda wuzuye.

Agaruka ku nsanganyamatsiko y’uru Rugerero igira iti: “Duhamye umuco w’ubutore twimakaza ubumwe n’ubudaheranwa”, Madamu Alice yasabye urubyiruko ruri mu Rugerero rw’Inkomezabigwi 13 guharanira ubutore, gukomera ku ndangagaciro z’umuco nyarwanda no kwimakaza ubumwe n’ubudaheranwa mu bikorwa byose ruzakora. Yanabibukije akamaro ko kwitabira neza gahunda zose zateganyijwe mu gihe cy’Urugerero, kuko ari zo zizabafasha kuba abaturage bafite inshingano n’uruhare rufatika mu iterambere ry’igihugu.

Gahunda y’Urugerero Inkomezabigwi icyiciro cya 13 yitabiriwe n’abanyeshuri basoje amashuri yisumbuye mu mwaka w’amashuri wa 2024/2026, bikaba byitezwe ko izasozwa urubyiruko rwayitabiriye rufite ubumenyi ku bijyanye n’umuco w’ubukorerabushake, ubumwe bw’Abanyarwanda n’ubudaheranwa, gukunda igihugu, ndetse n’izindi ndangagaciro zubaka Umunyarwanda w’ejo hazaza.