Mu rwego rwo gukomeza kwimakaza uruhare rw’urubyiruko mu iterambere ry’igihugu, mu mirenge yose 15 igize Akarere ka Nyamasheke hakozwe umuganda wihariye w’urubyiruko w’igihembwe cya mbere cya 2025/2026. Ku rwego rw’akarere, uyu muganda wabereye mu Murenge wa Karengera mu kagari ka Mwezi, aho urubyiruko rwahuriye hamwe rutunda amatafari yo kubaka inzu y’umuturage utishoboye.

Insanganyamatsiko y’uyu muganda yari “Uruhare rw’urubyiruko mu kurwanya ibiza.” Ni insanganyamatsiko igamije gushishikariza urubyiruko kugira uruhare mu bikorwa byo kurengera ibidukikije, gufata neza ibikorwaremezo, ndetse no kwirinda ibikorwa byose bishobora guteza ibiza.

Uyu muganda witabiriwe n’abayobozi batandukanye barimo bamwe mu bagize Inama y’Igihugu y’Urubyiruko ku rwego rw’Akarere ka Nyamasheke, Umukozi w’Akarere ushinzwe umuco n’urubyiruko n’abandi bakozi b’Akarere, hamwe n’ingabo n’inzego z’umutekano.

Madamu Musabyimana Leoncie, Umuhuzabikorwa wungirije w’Inama y'igihugu y'Urubyiruko ku rwego rw’Akarere, yashimiye urubyiruko rwitabiriye umuganda, abasaba gukomeza kugira uruhare rugaragara mu bikorwa by’iterambere ry'igihugu no gukoresha imbaraga zabo mu kwiyubakira igihugu. Yanibukije urubyiruko ko rugomba gukoresha neza imbuga nkoranyambaga, ndetse rugakoresha amahirwe yose agenerwa urubyiruko mu rwego rwo kwiteza imbere.

Mu bundi butumwa urubyiruko rwasabwe gukomeza kurangwa n’ikinyabupfura, gukunda umurimo nk’isoko y’iterambere, ndetse no kwirinda ikoreshwa ry’ibiyobyabwenge byangiza ejo hazaza h’umuntu n’ah’igihugu muri rusange.