Ku wa 26 Nyakanga 2019 ku biro by’Akarere ka Nyamashe habereye imurikabikorwa ry’amakoperative akorera mu Karere ka Nyamasheke, hanahembwa amakoperative yahize ayandi mu kugira imikorere myiza.

Umuyobozi w’ Akarere Wungirije Ushinzwe Iterambere ry’ Ubukungu, Ntaganira Josué Michel yakiriye Prof: Jean Bosco Harerimana, Umuyobozi mukuru w’ Ikigo cy’Igihugu cy’Amakoperative (RCA) nk’umushyitsi mukuru muri iri murikabokorwa ryahujwe n’umunsi Mpuzamahanga w’ Amakoperative.

Umuyobozi w’Akarere Wungirije Ushinzwe Iterambere ry’ Ubukungu yavuze ko amwe mu makoperative akorera muri aka Karere, yiteje imbere ku buryo bugaragara ndetse bikaba byaragiriye akamaro abanyamuryango bayo.

Ati; “Hari amakoperative akora neza, yiteje imbere ku buryo bugaragara agafasha abanyamuryango bayo nabo bakiteza imbere, biyishyurira ubwisungane mu kwivuza , korozanya muri gahunda ya girinka n’ibindi”

Umuyobozi w’Akarere Wungirije yakomeje avugako ubu mu Karere habarurirwa inganda 3 z’icyayi byose bikaba bituruka ku gukora neza kw’abibumbiye hamwe bagahuza imbaraga, anasaba amakoperative gukomeza gukora neza, gucunga neza umutungo wa koperative ndetse no gukomeza guharanira inyungu z’abanyamuryango.

Muri iri murikabikorwa kandi hanahembwe amakoperative 15 yahize ayandi mu mirenge akoreramo. Ku rwego rw’Akarere aya makoperative yatoranyijwemo 5 ya mbere ahabwa imashini ifotora impapuro ikanazisohora (scanner and printing machine) kuri buri koperative, 5 ziza ku mwanya wa kabiri zahawe mudasobwa zo mu biro (desktop), 5 zisigaye zihabwa mudasobwa ngendanwa (Laptop). Hanahembwe kandi koperative COOPHTE Mwaga –Gisakura nka Koperative yahize izindi mu Karere, yanahawe igikombe cy’ishimwe.

Ngirinshuti Callixte, Umuyobozi w’iyi Koperative avuga ko iki gikombe bagikesha gukora neza, guharanira inyungu rusange z’abanyamuryango ndetse na ba bandi batari muri Koperative bikabagirira inyungu.

Umuyobozi Mukuru w’ Ikigo cy’ Igihugu cy’Amakoperative (RCA) Prof Jean Bosco Harerimana, ashima uruhare rw’ amakoperative ayasaba gukomeza gukora neza, anabizeza ubufatanye.

Akarere ka Nyamasheke kabarurirwamo amakoperative 284, menshi muri yo akora neza, andi aracyari mu nzira zo kwiyubaka ndetse akanakurikiranirwa hafi n’Ubuyobozi bw’aka Karere.