Kuri uyu wa 05 Kanama 2025 ubwo Umuyobozi wungirije ushinzwe itarambere ry'ubukungu Bwana Muhayeyezu Joseph Desiré yafunguraga ku mugaragaro inama nyunguranabitekerezo ku ishyirwa mu bikorwa ry'umushinga HIR-RDDP2 yashimiye umufatanyabikorwa HEIFER kuba yarahisemo ko uyu mushinga wagezwa mu karere ka Nyamasheke nk'akarere kari mu tudafite umusaruro w'amata udahagije. 

Yasabye abaganga b'amatungo ba leta n'abigenga bazakorana n'uyu mushinga mu gufasha abaturage bazahabwa inka, kuzabikora neza uko bigenwa, birinda gukora ibinyuranyije n'amabwiriza agenga ishyirwa mu bikorwa ry'umushinga, kugira ngo umusaruro w'amata witezwe uzagerweho kandi n'abaturage bahawe inka biteze imbere. 

Umushinga HIR-RDDP2 ni umushinga wa Minisiteri y'ubuhinzi n'ubworozi n'ikigo cy'igihugu gishinzwe guteza imbere ubuhinzi n'ubworozi (RAB), ukaba uterwa inkunga n'umushinga “HEIFER”. Ni umushinga uri gukorwa mu gice cyawo cya kabiri, aho ukorera mu turere 27 na Nyamasheke ibariwemo. 

Ishyirwa mu bikorwa ry'uyu mushinga rishingiye ku itangwa ry'inka 30 muri buri murenge, abahawe inka bakibumbira mu matsinda yo kwiteza imbere kandi bagahabwa amahugurwa abafasha kwita ku nka bahawe. Muri buri murenge kandi hateganyijwe umuganga w'amatungo uzafasha abaturage mu gukurikirana no gufata neza izo nka, akazahabwa ibikoresho by'ingenzi bimufasha gusohoza inshingano uko bisabwa. 

Mu karere ka Nyamsheke, umushinga HIR-RDDP2 uzakorera mu mirenge ya Nyabitekeri, Bushenge, Ruharambuga, Bushekeri na Shangi. Mu nama nyunguranabitekerezo ku ishyirwamubikorwa ry'umushinga, hari hatumiwe abanyamabanga nshingwabikorwa b'imirenge yatoranyijwe n'abanyamabanga nshingwabikorwa b'utugari tw'iyo mirenge, abaganga b'amatungo batoranyijwe muri buri murenge, abahagarariye amatsinda y'abazahabwa inka, abahagarariye umushinga HEIFER na Minisiteri y'ubuhinzi n'ubworozi.