Kuri uyu 12 Kanama 2025 ba Mutimawurugo  baturutse mu mirenge 15 y’akerere ka Nyamasheke n’abashyitsi batandukanye bitabiriye inama rusange y’inama y’igihugu y’abagore (CNF).

Umuyobozi w’akarere wungirije ushinzwe iterambere ry’ubukungu Bwana  Muhayeyezu Joseph Désiré, atangiza inama yashimangiye uruhare rukomeye abagore bafite mu iterambere ry’akarere n’igihugu muri rusange , agaragaza  ko uruhare rwabo rwigaragaza muri byinshi byagezweho mu iterambere ry’umugore n’akarere, abasaba gukomeza muri uwo mujyo babungabunga umuryango wo soko y’iterambere rirambye.

Muri iyi nama, ba Mutimawurugo bagaragarijwe uko imihigo y’umwaka w’ingengo y’imari 2024/2025 yeshejwe, banamurikirwa imihigo mishya y’umwaka wa 2025/2026. Nyuma yo kuyisesengura, biyemeje gukomeza gukorana umurava no gufatanya n’abafatanyabikorwa batandukanye b’akarere mu rwego rwo kugera ku ntego z’iterambere rirambye, hagamijwe guteza imbere umugore n’abaturage muri rusange.

Ubuyobozi bwa CNF bwagaragaje ko imbaraga zishyirwa mu guteza imbere umugore zigira uruhare rukomeye mu kongera ubushobozi bw’imiryango, guhashya ubukene, no kuzamura ireme ry’uburezi n’imibereho myiza mu karere. Iyi nama yari ifite insanganyamatsiko igira iti: “Umuryango mu njishi, umusingi w’iterambere rirambye.”