Kuri uyu wa 15  Nyakanga 2019, mu Murenge wa Cyato ho mu Karere ka Nyamasheke habereye umuhango wo gutangiza ku mugaragaro ukwezi kwahariwe ibikorwa bya polisi, ku nsanganyamatsiko igira iti; imyaka 19 y'ubufatanye mu bikorwa byo kubungabunga umutekano no guteza imbere imibereho myiza y'abaturage.

Uyu muhango witabiriwe n' abayobozi batandukanye barimo Guverineri w'Intara y'Iburengrazuba Munyantwari Alphonse , Umuyobozi Mukuru wa Polisi Wungirije Ushinzwe Ibikorwa CP Felix Namuhoranye n' Abandi bayobozi bo mu nzego nkuru za Polisi y'Igihugu n'abandi bashyitsi batandukanye.

Abafashe ijambo bose muri uyu muhango bagarutse ku bufatanye bwiza buranga polisi y'igihugu ndetse n'abaturage mu bikorwa byo gucunga umutekano ndetse no guteza imbere imibereho myiza y'abaturage, nk'uko insanganyamatsiko ibigaragaza.

Umuyobozi w'Akarere ka Nyamasheke wafashe umwanya w'ijambo akanakira umushyitsi mukuri, yagarutse ku bufatanye n'amasezerano biri hagati ya polisi y'igihugu ndetse n'Akarere ka Nyamasheke, bishingiye cyane ku gukora ibikorwa byo gucunga umutekano ndetse n'ibiteza imbere abaturage.

CP Felix Namuhoranye umuyobozi wungirije wa polisi ku rwego rw'igihugu, yagarutse ku bikorwa bizakorwa na polisi zifatanyije n'abaturage muri iki gihe cy'ukwezi, aho buri cyumweru kiziharira igikorwa cyacyo. Ibikorwa bizakorwa birimo gucanira (gutanga umuriro w'amashanyarazi) mu ngo ijana (100), kubakira imiryango itishoboye amazu, gukora ubukangurambaga butandukanye ku kurwanya ibiyobyabwenge, ndetse no kurwanya inda zitateganyijwe mu rubyiruko.

Polisi kandi na none izagira uruhare rukomeye mu bikorwa byo gutanga amaraso, aho abapolisi bazatanga amaraso yo gutabara abarwayi batayafite.

Guverineri  w'Intara y' Iburengerazuba Alphonse Munyantwari wari Umushyitsi Mukuru kuri uyu munsi, yabwiye abaturage ko bakwiye gukomeza kubumbatira umutekano bafatanyije na polisi nk'uko byagiye bibaranga mu bihe byashize birinda gukomwa mu nkokora n'ibihuha, kuko abaturage aribo bafatanyabikorwa ba mbere bityo rero umutekano ukaba utagerwaho hatabayeho ubufatanye ku mpande zombi (abaturage bafatanyije na polisi). Yakomeje abasaba ko buri wese akwiye gukomeza kuba ijisho rya mugenzi we.

Muri uyu muhango kandi umudugudu wa Rusi washimiwe nk' umwe mu midugudu itekanye (utaragarayemo ibyaha) unagenerwa umuriro w'Amashanyarazi ukoresha ingufu z' imirasire y'izuba uzahabwa ingo 100.

Aba bayobozi kandi batangije imirimo yo kubaka inzu izakoreramo ibiro by'Umudugudu wa Yove nabyo nk'igihembo cy'umudugudu utekanye. Iyi nzu igizwe n'icyumba cy'inama, aho abaturage bazajya bahurira n'abayobozi bagahana ibitekerezo bibafasha kurushaho kwiyubaka, ibiro by'Umukuru w'Umudugudu ndetse n'ibiro by'Ushinzwe Umutekano.

Umuyobozi w'umudugudu wa Rusi wahawe ishimwe, yavuzeko ibanga ari ukwicara hamwe bakajya inama, guca ubushoreke, kurwanya ibiyobyabwenge ndetse no gushyira hamwe n'abaturage bagahigira hamwe. Yakomeje avugako ari ishema ku mudugudu ayobora kandi ko bagiye gukomeza guharanira kuba aba mbere, doreko iki gihembo ataricyo cya mbere.

Iyi akaba ari gahunda ngarukamwaka ya polisi y'igihugu aho umudugudu uza ku isonga mu kurwanya ibyaha, polisi iwukoreramo ibikorwa byo gutanga amashanyarazi ndetse n'ibindi bikorwa bitandukanye by'iterambere.