Kuri uyu wa 12 Kanama ku Rwunge rw’amashuri ya Gisakura ruherereye mu Murenge wa Bushekeri mu kagari ka Buvugira ho mu Karere ka Nyamasheke hatashywe ibyumba bine byubatswe ku bufatanye bw’Akarere ka Nyamasheke n’Ikigo cy’Igihugu cy’Iterambere (RDB)

Nk’uko byasobanuwe n’Umuyobozi Mukuru muri RBD ushinzwe Ubukerarugrndo Madamazela  KALIZA Belyse, ngo aya mashuri yubatswe muri gahunda Ikigo cy’Igihugu cy’Iterambere gifite yo gusaranganya umusaruro ukomoka mu bukerarugendo ukagera ku baturage baturaniye ibikorwa bimwe byinjiriza Igihugu amadevize binyuze mu bukerarugendo mu rwego rwo kubashishikariza gukomeza gufata neza amapariki nka Nyungwe n’ibindi bikorwa by’Ubukerarugendo.

Mu ijambo ry’Umuyobozi w’Akarere Wungirije Ushinzwe Imari  n’Iterambere ry’Ubukungu Bwana NTAGANIRA Josoué Michel wari uhagarariye Ubuyobozi bw’Akarere yashimiye byimazeyo Ikigo cy’Igihugu cy’Iterambere RDB ku nkunga ifatika bateye Akarere ka Nyamasheke kandi ifite akamaro mu buryo burambye. Yijeje ko bazakomeza gufata neza ayo mashuri bubakiwe ndetse no gukomeza kubungabunga Parike ya Nyungwe by’umwihariko n’Ibidukikije muri rusange cyane cyane ko umusaruro waturutsemo ari wo bakesha ayo mashuri ndetse bakanahangana na ba rushimusi

Mu izina rya Minisiteri y’Uburezi Umunyamabanga Uhoraho muri Ministeri y’Uburezi Dr. Célestin NTIVUGURUZWA wari n’umushyitsi mukuru kuri uyu munsi yashimiye Leta y’u Rwanda yatekereje kuzajya isaranganya umusaruro ukomoka ku bukerarugendo akomeza avuga ko RDB iteye inkunga ikomeye Minisiteri y’Uburezi muri gahunda yayo yo kubaka ibyumba by’amashuri ndetse no gusana ibishaje. Yaboneyeho gusaba abaturage kuba abafatanyabikorwa batadohoka mu gufata neza ibidukikije na Pariki ya Nyungwe by’umwihariko. Yanashimye kandi  uruhare runini Ingabo na Police bagaragaza mu kurinda umutekano atari uw’abaturage gusa ahubwo n’uw’urusobe rw’Ibinyabuzima muri rusange

Ibi byumba bine by’amashuri byuzuye bitwaye amafaranga y’u Rwanda angana na miliyoni makumyaabiri n’enye, ibihumbi magana atandatu na mirongo icyenda na birindwi magana abiri na mirongo inani n’atandatu (24697286 Frw) muri ayo, agera kuri Miliyoni cumi n’eshatu, ibihumbi magana atatu mirongo inanai na bine magana ane na mirongo itanu (13384450 Frw) ni yo yatanzwe na’ikigo cy’Igihugu cy’Iterambere.

Muri uyu muhango kandi hanatwitswe bimwe mu bikoresho byakoreshwa na ba rushimusi nk’ikimenyetso cyo kwamaganira  kure ibikorwa byo kwangiza Urusobe rw’ibinyabuzima.

TUYIZERE Jacques

PRMCO/NYAMASHEKE