Kuri uyu wa 9 Mutarama 2026, Guverineri w’Intara y’Iburengerazuba, Bwana Ntibitura Jean Bosco, ari kumwe n’abagize Komite Nyobozi y’Akarere ka Nyamasheke ndetse na bamwe mu bagize Komite Itaguye y’Umutekano mu karere, yasuye kandi yirebera imbonankubone ibikorwa by’iterambere biri mu karere, uruhare rwabyo mu iterambere ry'igihugu, akarere n'abaturage muri rusange.

Uruzinduko rwatangiye hasurwa Nyungwe Management Company ishinzwe gukurikirana no guteza imbere ibikorwa by'ubukerarugendo muri Pariki y'igihugu ya Nyungwe ikorera mu Gisakura, ubuyobozi bw'iyi kompanyi bugaragaza ibikorwa bitandukanye by’ubukerarugendo bikorerwa muri Pariki y'igihugu ya Nyungwe ku ruhande rw'akarere ka Nyamasheke.

N'ubwo hari byinshi byagezweho mu iterambere rituruka ku bukerarugendo bukorerwa muri Pariki y'igihugu ya Nyungwe, ubuyobozi bwa Nyungwe Management Comany bavuze ko hakiri imbogamizi zijyanye n'imihanda idatunganyije neza ndetse n’ikibazo cy’abaturage binjira mu ishyamba mu bikorwa by’ubucukuzi bw’amabuye y’agaciro butemewe n'ibindi. Guverineri Ntibitura Jean Bosco yashimye uruhare Nyungwe Management Company igira mu iterambere ry’igihugu n’imibereho y’abaturage, abizeza ko Intara n’Akarere bazakomeza gufatanya mu gushakira ibisubizo ibibazo by’imihanda byagaragajwe no gukomeza kwibutsa inzegi zibishinzwe muri rusange. 

Nyuma yo kuva muri Nyungwe, abayobozi bakomeje uruzinduko rwabo basura Kompanyi Kivu Choice Company, ikorera ubworozi bw’amafi mu kiyaga cya Kivu mu Murenge wa Kagano. Bakiriwe n’ubuyobozi bwa kompanyi basobanurirwa imiterere y’uyu mushinga watangiye mu 2022, umusaruro wawo n’uruhare ugira mu iterambere ry’Akarere n’imibereho myiza y’abaturage. Abayobozi basuye ahororerwa amafi muri kareremba banareba uko amafi agaburirwa. Guverineri yashimye iyi kompanyi ayizeza gukomeza ubufatanye na Leta mu guteza imbere uru rwego rw'ubworozi bw'amafi mu karere muri rusange.

Uruzinduko rwakomereje muri Kaminuza yigenga ya Kibogora (Kibogora Polytechnic), aho abayobozi baganiriye n’ubuyobozi bwayo ku rugendo rwa kaminuza kuva yashingwa mu 2012 ifite abanyeshuri bagera kuri 300, kugeza ubu ikaba imaze kugera ku banyeshuri bagera ku bihumbi 10,000. Ubuyobozi bwa kaminuza bwagaragaje ko ifite amashami atandukanye afasha urubyiruko n'abakuze kwiyungura ubumenyi, by’umwihariko ishami ry’ubuzima rifite umubare munini w’abanyeshuri. Bagaragaje kandi umushinga wo gutangiza ishuri ry'ubuvuzi, aho inyigo y’inyubako yamaze kurangira, hakaba hari icyizere ko imirimo yo kuyubaka izatangira vuba, ikazatwara asaga miliyari 5 z’Amafaranga y’u Rwanda.

Nyuma yo gusura kaminuza, abayobozi basuye Ibitaro byo ku rwego rwa kabiri byigisha bya Kibogora (Kibogora Level Two Teaching Hospital), bakirwa n’Umuyobozi mukuru wabyo wabagejejeho isura rusange y’ibi bitaro n’intambwe imaze guterwa mu gutanga serivisi z’ubuvuzi, cyane cyane mu kubaga (surgery), ubuvuzi bw’abagore (gyneco-obstetrics), indwara z’imbere mu mubiri (internal medicine), ubuvuzi bw’abana (pediatrics) n’izindi serivisi zitandukanye. N'ubwo hagaragarijwe intambwe nziza, hanagaragajwe imbogamizi zirimo kubura uruganda ruyungurura umwuka (Oxygen plant), umubare muke w’abakozi, amacumbi y’abakozi n’ibindi. Guverineri yashimiye ibitaro ku kazi keza bikora, abizeza gukomeza ubufatanye n’inzego bireba kugira ngo izo mbogamizi zigende zikemuka.

Uruzinduko rwasojwe hasurwa Uruganda rw’icyayi rwa Gatare ruherereye mu Murenge wa Karambi, aho abayobozi bakiriwe n’ubuyobozi bw’uruganda basobanurirwa ibikorwa by'uruganda n’uruhare rufatika rugira mu iterambere ry’Akarere ka Nyamasheke n’imibereho y’abaturage. Abayobozi banatemberejwe mu ruganda bareba uko icyayi gitunganywa kuva mu murima kugeza ku musaruro wanyuma. Guverineri yashimiye uruganda n'ubuyobozi bwarwo abizeza ubufatanye mu gushakira umuti zimwe mu mbogamizi zagaragajwe cyane cyane izijyanye no kwagura ubutaka buhingwaho icyayi.