Kuri uyu wa 11 Nzeri 2025, mu murenge wa Cyato, Akagari ka Bisumo, habereye umuhango wo gushyingura mu cyubahiro abaturage umunani (8) bitabye Imana ku wa 9 Nzeri 2025 mu mpanuka yabereye ku rugomero rwa Nyirahindwe I ruri kubakwa na Kompanyi ya DNG-Rwanda mu murenge wa Cyato, akagari ka Bisumo.

Uyu muhango witabiriwe na Guverineri w’Intara y’Iburengerazuba Bwana Ntibitura Jean Bosco, abayobozi b’Akarere ka Nyamasheke barimo komite nyobozi, abahagarariye Inama Njyanama y’Akarere, Komite y’Umutekano y’Akarere itaguye, Ingabo (RDF), izindi nzego z’umutekano, ndetse n’abaturage benshi bo mu mirenge ya Cyato na Karambi bari baje guherekeza ababo.

Mu ijambo Guverineri Ntibitura Jean Bosco yagejeje ku bitabiriye uyu muhango, yatanze ubutumwa bw’ihumure no gukomeza imiryango yabuze abayo, abizeza ko ubuyobozi bw’Intara n’Akarere ka Nyamasheke buzakomeza kubaba hafi muri ibi bihe bigoye, bubasindagiza mu rugendo rwo gukomeza kubaho nyuma y’iyi mpanuka ibabaje.

Imiryango yabuze abayo yasabye ubuyobozi ko bwabafasha gukurikirana iki kibazo kugira ngo abasizwe n'abaguye mu mpanuka bazabashe gukomeza kubaho, haboneka impozamarira yazabafasha gukomeza kubaho n'ubwo bigoye. 

Numan Jafari uhagarariye kompanyi DNG-Rwanda yubaka urugomero rw'amashanyarazi rwa Nyirahindwe I yihanganishije imiryango y'abaguye mu mpanuka hamwe n'abakomeretse bari mu bitaro, abizeza ko iyi Kompanyi izaba hafi imiryango yasizwe n'abaguye mu mpanuka n'abakomeretse.