Mu rwego rwo gushyira mu bikorwa gahunda y’Intara y’Iburengerazuba yo gusura no kuganira n’ubuyobozi bw’uturere, kuri uyu wa 08 Kanama 2025 Guverineri w’Intara y’Iburengerazubwa Bwana Ntibitura Jean Bosco yasuye akarere ka Nyamasheke aganira n’abayobozi ku ngingo zinyuranye zibanze ku mibereho myiza y’abaturage.

Uyu muyobozi yakiriwe n’ubuyobozi bw’akarere ku cyicaro cyako, ahura n’abayobozi batandukanye barimo Komite Nyobozi y’akarere, Biro Njyanama y’akarere, Komite y’Umutekano y’Akarere itaguye, Abanyamabanga Nshingwabikorwa b’imirenge, n’abandi bayobozi batandukanye.

Mu biganiro byahuje Hon. Guverineri n’abayobozi b’akarere, hagarutswe cyane ku ngingo zijyanye n’imibereho myiza y’abaturage, imikorere n’imikoranire y’inzego zitandukanye mu karere, ndetse no kungurana ibitekerezo ku buryo bushya bwo gukemura ibibazo by’abaturage ku buryo burambye kandi bwihuse.

Ubuyobozi bw'akarere bwashimiye Hon. Guverineri bumwizeza ko bugiye gushyira mu bikorwa impanuro n'inama zinyuranye zatanzwe ku bw'inyungu z'umuturage. Bwavuze kandi ko ibikorwa bimwe na bimwe bigaragara ko bitagenda ku muvuduko ukwiye akarere kiyemeje kwishakamo ubushobozi kugira ngo ibyo bikorwa byihute cyane cyane kwihutisha kubakira abacitse ku icumu rya Jenoside yakorewe abatutsi batishoboye. 

Hon. Guverineri yasoje ashima ubwitabire, ikiganiro cyiza cyatanzwe n'akarere ku mibereho y'abaturage n'ibindi bikorwa by'iterambere ry'akarere muri rusange. Asaba imikoranire myiza kurushaho hagati y'ingabo n'inzego z'umutekano, JADF n'abandi kugira ngo akarere kagere ku iterambere ryihuse. Yasoje asaba ubufatanye mu karere, asaba abafite uburambe gufasha abakiri bashya mu kazi kugira ngo buri wese abashe gutanga umusaruro ukwiye.