Nyamasheke, 14 Kanama 2025 – Mu rwego rwo kwegera abaturage no kuganira nabo kuri gahunda zinyuranye za Leta, Guverineri w’Intara y’Iburengerazuba, Bwana Ntibitura Jean Bosco, yasuye Akarere ka Nyamasheke, aganira n’abaturage bo mu Mirenge ya Rangiro na Cyato.

Ibiganiro byahuriyemo abaturage n’ubuyobozi byibanze ku ngingo eshatu z’ingenzi: imiyoborere myiza, iterambere, n’imibereho myiza. Guverineri Ntibitura yasabye abaturage guha agaciro umutekano, abibutsa ko ari wo musingi w’ibikorwa byose by’iterambere. “Iyo tutagize uruhare mu kubungabunga umutekano, urahungabana. Ntabwo tuzabona umusirikare cyangwa umupolisi uhagarara kuri buri rugo ngo arurinde, ni ngombwa gutangira amakuru ku gihe,” Guverineri yibutsa abaturage.

Yagarutse kandi ku bibazo bikwirakwiza amakimbirane mu miryango birimo ikoreshwa ry’ibiyobyabwenge, inzoga z’inkorano zitemewe, gusesagura umutungo, ubushoreke, uburaya, ubusambanyi n’izindi ngeso zisenya umuryango. Yabibukije ko umuryango ari ishingiro ry’igihugu, abasaba kuwusigasira no kuwurinda icyawuhungabanya.

Mu butumwa bwe, Guverineri Ntibitura yanasabye abaturage kujyana abana mu mashuri, abibutsa ko nta gihugu na kimwe ku isi cyateye imbere gifite abaturage batize. 

Guverineri yagarutse kuri gahunda zinyuranye nka Girinka, ubuzima, iterambere n'ibindi yizeza ubuvugizi kuri bimwe bisaba ubwo buvugizi, yizeza abaturage ko ibidasaba ubuvugizi Leta izakomeza kugenda ibibagezaho, ati: “mushonje muhishiwe.”