Kuri uyu wa 14 Nyakanga Umuyobozi w’Intara y’Uburengerazuba Madame MUKANDASIRA Cartas yasuye Akarere ka Nyamasheke Umurenge wa Cyato muri gahunda isanzwe yo kwegera abaturage no kuganira nabo. Uru ruzinduko kandi rw’Umuyobozi w’Intara yari aherekejwe n’Umuyobozi wa police mu Ntara ndetse n’Umuyobozi w’Ingabo Rusizi na Nyamasheke.

Mu ijambo ry’Ikaze ryavuzwe n’Umuyobozi w’Akarere Bwana KAMALI Aimé Fabien yashimiye Ubuyobozi bw’Intara budahwema kubaba hafi no kubafasha mu gukemura ibibazo by’Abaturage anaboneraho gushima Abaturage b’Umurenge wa Cyato uburyo ari Intangarugero mu karere.

Umuyobozi wa police mu Ntara y’Uburenganzira ACP MUTEZINTARE Bertin na we yashimiye abaturage b’Umurenge wa Cyato ko batagaragarwaho n’ibikorwa by’urugomo anaboneraho kubasaba gukomeza kubungabunga umutekano ngo hatazagira ubinjirana aturutse ahandi. Yabibukije kandi gukomeza urugamba rwo gusubiza abana ku mashuri, kwirinda amakimbirane yo mu ngo ndetse n’icuruzwa ry’abantu.

Mu ijambo ry’Umuyobozi w’Intara na we yunze mu ry’abamubanjirije ashimira Abaturage uburyo bitabiriye ari benshi kandi bakeye anaboneraho kubabwira ko Abaturage ari bo bafite iya mbere mu miyoborere y’Igihugu kuko badahari abayobozi batabona uwo bayobora bityo abasaba gukoresha abayobozi babo anakangurira abayobozi kurushaho kwegera Abaturage. Yibukije abaturage impamvu yo gukorera ku mihigo kugira ngo bajye babasha kumenya ibyarangiye n’ibisigaye ngo bibafashe mu igenamigambi.

Yanageye kandi Abaturage umwanya wo kwinigura bakabaza ibibazo, bagatanga ibitekerezo ndetse n’ibyifuzo byagenderwaho mu kubaka Igihugu muri rusange nUmurenge wa Cyato by’Umwihariko

TUYIZERE Jacques

PRMCO/ NYAMASHEKE