Kuri uyu wa kabiri tariki ya 06/12/2016, Guverineri w’Intara y’Iburengerazuba Bwana MUNYANTWARI Alphonse yatanze ikiganiro mu Itorero ry’Abakuru b’imidugudu, Abagize inama Nyanama z’utugari ndetse n’imirenge ririkubera mu Karere ka Nyamasheke.

Ubwo yatangaga ikiganiro yaba kuri site y’Ishur Ryisumbuye rya Gafunzo no mu Rwunge rw’Amashuri rwa Karengera,yakirijwe morale nyinshi cyane bigaragara ko abatozwa baryohewe n’itorero.

Mu kiganiro yatanze Umuyobozi w’Intara yagarutse ku Myumvire n’Imyitwarire ikwiye kuranga Umunyarwanda muri rusange n’Umuyobozi by’Umwihariko.

Yibukije abatozwa kombere y’umwaduko w’abakoroni mu Rwanda, Abanyarwanda bari bamwe.  Yagize ati “mbere y’uko ba gashakabuhake baza mu Rwanda, Abanyarwanda bari bamwe nta kibatandukanyije; mu ntambara zo kwagura u Rwanda bose barafatanyaga, n’aho bafashe bakaba Abanyarwanda buzuye batari igicagate nffo ni uko baje nyuma” aha yabibutsaga ko Ubunyarwanda ari yo ndangagaciro ikomeye bakwiye kwimakaza bityo bikanabavana mu kavuyo  k’isi  bikaafasha kwihitiramo uko bakwiye kubaho. Yabibukije ko imyumvire mibi yaranze u Rwanda bamaze guta iyo ndangagaciro yarukururiye  mu kaga bigera n’aho Abanyarwanda ubwabo bamarana.

Yibukije na none abatozwa ko imyumvire myiza yabohoye u Rwanda, ubu rukaba rukataje mu iterambere mu ruhando rw’amahanga. Aha rero yasabye aba bayobozi bari mu itorero kugira imyumvire yo hejuru, bituma imitekerereze iba ifututse bityo n’imikorere ikagaragarira bose ko ari iy’umuyobozi usobanutse. Yanaboneyeho kubasaba kutumvira amabwire y’ubonetse uwo ari we wese ahubwo abasaba gutera ikirenge mu cy’Intore izirusha intambwe maze bagaha abaturage ibyo babagomba bazirikana ko bagomba gukorera Umuturage ariko kandi banakorana na we. Yashimangiye Indangagaciro yo kwicisha bugufi no gutega amatwi abo bayobora abibutsa ko ari wo mwambaro ubabereye.

Iri torero ririkubera ku masite ane yo mu karere ka Nyamasheke rikaba rihuje abagera ku 2914 rikazamara imisi irindwi aho abatozwa bahawa ibiganiro binyuranye, uyu akaba yari umunsi waryo wa 3

TUYIZERE Jacques

Public Relatons, Media and Communication Officer