Byagarutsweho n'umuyobozi w'akarere ka Nyamasheke Bwana Mupenzi Narcisse mu nama yahuje ubuyobozi bw'akarere n'abanyamabanga nshingwabikorwa b'utugari kuri uyu wa 23 Kamena 2025 ku biro by'akarere.

Iyi nama yari igamije kuganira kuri gahunda na politiki za Leta mu rwego rwo kurebera hamwe uburyo izi gahunda zishyirwa mu bikorwa, uburyo bukwiye bwo kunoza ibitanoze no kuzamura ubwitabire bw'abaturage muri gahunda za Leta.

Umuyobozi w'akarere yasabye abanyamabanga nshingwabikorwa gukoresha uburyo bukwiye mu miyoborere y'akagari cyane cyane hifashishijwe ubukangurambaga kugira ngo abaturage babashe kwitabira gahunda za Leta  babyumva neza aho kugira ngo bazitabire bumva ko ari agahato. Umuyobozi w'akarere yasabye abitabiriye inama kuba intangarugero bitandukanya n'imyifatire idakwiye abayobozi, bakagira ibyo bigomwa kubera inshingano z'ubuyobozi bafite.

Muri iyi nama harebewe hamwe uko abaturage bitabira gahunda za Leta nka Ejo Heza, haganirwa ku ngamba zikwiye gukoreshwa kugira ngo utugari tukiri inyuma tubashe kuzamuka, n'ahakiri imbogamizi akarere kiyemeza gukora ubuvugizi kugira ngo utwo tugari natwo tubashe kugera ku ntego. 

Umuyobozi w'akarere yakiriye ibibazo, ibitekerezo n'ibyifuzo by'abitabiriye inama, hatangwa imirongo n'ibisubizo bikwiye, kandi abitabiriye inama bizezwa ubufatanye mu ngamba zo guteza imbere umuturage.