Mu Karere ka Nyamasheke hatangijwe ku mugaragaro gahunda nshya yiswe mu ndimi z'amahanga “Combating Malnutrition In Rwanda Trough Sustainable Food System (CMR-FS)”, ugenekereje mu Kinyarwanda ikaba ari gahunda yo Kurwanya Imirire Mibi mu Rwanda binyuze muri sistemu y'ibiribwa irambye” izamara imyaka itanu (2025–2030); ikaba igamije kurwanya imirire mibi no kugabanya igwingira mu bana bato.

Iki gikorwa cyabereye muri Hoteri Ibigabiro, kitabirwa kandi kiyoborwa n’Umuyobozi w’ishami ry’ubuzima mu Karere ka Nyamasheke, abafatanyabikorwa b'akarere muri serivisi z'ubuzima, abayobozi b'imirenge izakoreramo uyu mushinga n'abandi batumirwa, basobanuriwe basobanurirwa iby’ingenzi bigize umushinga, uburyo uzashyirwa mu bikorwa ndetse n’inshingano z’abafatanyabikorwa bose.

Umushinga wa CMR-FS uterwa inkunga n’Ikigo cy’Abasuwisi gishinzwe Iterambere n’Ubufatanye (Swiss Agency for Development and Cooperation – SDC) ku bufatanye n’Impuzamiryango Mpuzamahanga ishinzwe guteza imbere Indyo yuzuye (Global Alliance for Improved Nutrition – GAIN). Ni umushinga uzakorana na Minisiteri y'Ubuhinzi n’Ubworozi (MINAGRI), Ikigo cy’Igihugu gishinzwe kurwanya indwara zitandura (National Commission for the Prevention of Non-Communicable Diseases – NCDA), Ikigo cy’Igihugu gishinzwe Ubuzima (Rwanda Biomedical Centre – RBC) ndetse n’Ubuyobozi bw’Akarere ka Nyamasheke.

Ubuyobozi bw’akarere bwishimiye uyu mushinga uzakorera mu mirenge itanu y'akarere (Bushekeri, Rangiro, Kagano, Kanjongo na Mahembe), bugaragaza ko ari intambwe ishimishije mu rugamba rwo kurwanya imirire mibi no kugabanya igwingira mu bana bato cyane ko akarere ka Nyamasheke kari mu turere tukibarizwamo abana bari mu murire mibi. Mu bikorwa biteganyijwe mu isyirwa mu bikorwa ry'uyu mushinga harimo gutanga ubumenyi n’ubufasha ku baturage mu buryo burambye bwo kubona, gutegura no gukoresha indyo yuzuye kandi iboneye.