Kuri uyu wa 07 Werurwe 2025, umuyobozi w’akarere wungirije ushinzwe iterambere ry’imibereho myiza y’abaturage Madamu Mukankusi Athanasie yakiriye abagize Inteko Ishinga Amategeko bayobowe na Senateri Nyinawamwiza Laetitia ari kumwe n'Abadepite Ndereyemungu Joseph na Nsangabandi Ernest, mu rwego rwo gutegura umunsi mpuzamahanga w'umugore. 

Hateganyijwe ibiganiro n’inzego zinyuranye z’ubuyobozi, iz’umutekano, urubyiruko n’abafatanyabikorwa b’akarere mu rwego rwo kurebera hamwe icyakorwa ngo umuryango ubeho utekanye, uruhare rw’umugore mu muryango utekanye kandi uteye imbere. 

Nyuma y’ibiganiro n’inzego zinyuranye biteganyijwe ko habaho gusura imiryango ikiri mu makimbirane n’iyayavuyemo mu rwego rwo gukomeza ubukangurambaga mu kwirinda amakimbirane yo mu ngo. 
Ibi birakorwa kandi mu rwego rwo kwitegura kwizihiza umunsi mpuzamahanga w’umugore uzizihizwa ejo kuwa 08 Werurwe 2025 ku nsanganyamatsiko igira iti: “Umugore ni uw’agaciro.”

Ibikorwa birimo ibiganiro n’inzego zinyuranye ku muryango, byateguwe n’ihuriro ry’abanyarwandakazi bari mu nteko ishinga amategeko (FFRP) hagamijwe gukomeza guteza imbere uburenganzira bw’abagore n’uruhare rwabo mu iterambere ryabo n’igihugu muri rusange. Abagore barakomeza gukangurirwa kumenya inshingano zabo mu kwita ku muryango hirindwa amakimbirane, guharanira kwiteza imbere, guteza imbere igihugu no kubaka aheza h’abakiri bato. 

Abagize inteko ishinga amategeko bazifatanya n’akarere mu kwizihiza umunsi mpuzamahanga w’umugore, uzizihizwa mu mirenge yose y’akarere, ku rwego rw’akarere uyu munsi mpuzamahanga w’umugore ukaba uzizihirizwa mu murenge wa Karengera.