Kuri uyu wa gatandatu  tariki ya 8/6/2024 Abayobozi b'Akarere ka Nyamasheke,abakozi b'Akarere n'abaturage bitabiriye Siporo rusange yihariye y'abagore yateguwe ku  bufatanye na MIGEPROF.

Ni siporo yabaye mu mirenge yose igize Akarere ka Nyamasheke ariko ku rwego rw'Akarere ibera mu murenge wa Kanjongo.

Nyuma y’uko bigaragaye ko imibare y’abarwaye indwara zitandura n’ibibazo byo mu mutwe igenda yiyongera mu byiciro byose by’abanyarwanda, Siporo ikoreshwa nka bumwe mu buryo bwafasha kuzikumira, hakaba haragiyeho sport rusange itegurwa n’Umujyi wa Kigali n’Uturere twose tugize igihugu.

Ni muri urwo rwego, Minisiteri y’Uburinganire n’Iterambere ry’Umuryango ku bufatanye n’Inama y’igihugu y’Abagore, Ihuriro ry’Abanyarwandakazi bari mu Nteko Ishinga Amategeko, Urwego rw'Igihugu Rushinzwe Iyubahirizwa ry'Ihame ry'Uburinganire n’Ikigo cy’Igihugu Gishinzwe Imikurire no kurengera umwana biyemeje gutegura Siporo Rusange nk’igikorwa kizahuza abagore ku rwego rw’igihugu ku nsaganyamatsiko igira iti: “ Siporo ni Ubuzima: Abagore Twagiye”

Intego nyamukuru ni ugukora siporo hazirikanwa uruhare rw’umugore mu iterambere ry’igihugu cye mu myaka 30 ishize,  gufata ingamba zo gukomeza gufatanya n’abandi mu kurema u Rwanda twifuza, bashyira imbere kugira ubuzima bwiza, buzira umuze.

Ubutumwa bw'umushyitsi mukuru ,Umuyobozi w'Akarere wungirije ushinzwe iterambere ry'Ubukungu bwana MUHAYEYEZU JOSEPH DESIRE,yashimiye abaturage bose bitabiriye siporo rusange,Ashimira uruhare rw'umugore mu iterambere ry'Igihugu kandi amusaba kwihatira gukora Siporo nk’umuco kuko bifasha kugira ubuzima bwiza haba ku muntu ku giti cye no k’umuryango muri rusange. Ibi bizagabanya indwara zitandura, ibibazo byo mu mutwe bisigaye byaribasiye benshi haba abakuru n’abato.

yasabye abaturage kugana ibigo by’ubuvuzi no kwipimisha kenshi mu rwego rwo gukumira indwara zitandura no kwita ku mirire myiza n’imikurire iboneye y’abana bato.

yongeye kwibutsa abagore ko bagomba gushyiramo imbaraga mu kubaka u Rwanda twifuza,  bubaka urunana mu rugamba rwo kwiteza imbere, guhangana n’ibibazo byugarije abagore n’abana b‘abakobwa no gushyiraho ingamba zo kubikemura mu buryo burambye.

yabasabye kugira uruhare mu gutegura gahunda y’Iterambere ry‘Uturere y’igihe kirekire (District Development Strategy), kwitabira gahunda za Leta zihuza abaturage (umuganda, inteko z’abaturage, umugoroba w’imiryango…) n‘amatora ateganyijwe muri Nyakanga 2024 by’umwihariko.

abitabiriye siporo bose basabwe gusigasira no Kwishimira ibyagezweho dukesha ubuyobozi bwiza burangajwe imbere na Nyakubahwa Perezida wa Repubulika Paul KAGAME.

muri iyi siporo kandi hapimwe indwara zitandura no kugirwa inama ku kubungabunga ubuzima