Mu cyumba cy’inama cy’Akarere ka Nyamasheke habereye inama yahuje Akarere na Tubura/Acre Fund n'abandi bafatanyabikorwa mu rwego rwo gutegura neza igihembwe cya 2026 A cyo gutera ibiti mu karere ka Nyamasheke. Iyi gahunda igamije kurengera ibidukikije, kongera umusaruro w’ubuhinzi, no guteza imbere imibereho myiza y’abaturage.

Ibiti byose bizaterwa mu buryo bukurikira:

• Ibiti 1,294,528 bivangwa n’imyaka, bigamije kurwanya isuri no kongera uburumbuke bw’ubutaka.
• Ibiti 2,500 by’imbuto ziribwa, bigamije kurwanya imirire mibi no kongera indyo yuzuye mu miryango.
• Ibiti 105,500 bivangwa na kawa, bigamije kongera ubuhehere bw’ubutaka no kuzamura umusaruro w’icyayi cy’u Rwanda.
• Ingemwe za kawa 63,000, zigamije kongera umusaruro wa kawa n’inyungu z’abaturage bahinga iki gihingwa.

Biteganyijwe ko ingo 57,316 z’abaturage bazahabwa ibi biti, bigafasha mu kubungabunga ibidukikije, kongera umusaruro w’ubuhinzi, no guteza imbere imibereho myiza y’abaturage.

Umuyobozi w'ishami ry'ubuhinzi n'umutungo kamere mu karere Bwana Twigenge Jean Marie Vianney yashimye ubufatanye bwa Tubura n'akarere ka Nyamasheke, agaragaza ko ibiti biteganyijwe guterwa mu karere bizagira uruhare rukomeye mu kubungabunga ibidukikije no kurwanya isuri muri rusange, kandi bikazagira uruhare mu kurwanya imirire mibi hatirengagijwe iterambere ry'abaturage bazatera ibiti bya kawa n'iry'akarere muri rusange.

Yasabye abafatanyabikorwa guha agaciro iki gikorwa kandi bakazakurikirana kugira ngo ibiti bizaterwa bizitabweho uko bikwiye kandi bitange umusaruro byitezweho.