Ku isaha ya saa mbili n'igice (08:30) za mugitondo cy'uwa 09 Nyakanga 2025 ku kigo cy'ishuri cyitiriwe Umuryango Mutagatifu (Institut Sainte Famille Nyamasheke) ni bwo umuyobozi w'akarere Bwana Mupenzi Narcisse yatangije ku mugaragaro ibizamini bisoza icyiciro cya mbere n'icya kabiri by'amashuri yisumbuye.

Umuyobozi w'akarere yasabye abana gukorana ubwitonzi kandi bagashishoza kugira ngo batsinde neza, abifuriza amahirwe no gutsinda. Ku masaha yavuzwe hejuru kandi ibizamini bisoza ibyiciro byombi by'amashuri yisumbuye byatangijwe mu yandi masantire y'ibizamini uko ari 34  hirya no hino mu karere ka Nyamasheke.

Abanyeshuri bagombaga gukora ibizamini bya Leta bisoza icyiciro cya mbere cy'amashuri yisumbuye ni 5598 bagizwe n'abahungu 2425 n'abakobwa 3173. 

Mu cyiciro cya kabiri cy'amashuri yisumbuye abagombaga gukora ikizamini cya Leta gisoza amashuri yisumbuye barimo abiga ubwarimu, ubuforomo n'ibaruramari bagera kuri 356 bagizwe n'abahungu 146 n'abakobwa 210. Hari kandi abiga mu mashuri y'imyuga n'ubumenyi ngiro bagera kuri 851 bagizwe n'abahungu 443 n'abakobwa 408. 

Abandi bagombaga gukora ikizamini cya Leta gisoza amashuri yisumbuye batiga ibyavuzwe hejuru ni 2413 bagizwe n'abahungu 798 n'abakobwa 1615.