Mu cyumba cy’inama cy’Akarere ka Nyamasheke, guhera ku wa 6-7 Kanama 2025, hateraniye  inama ihuza ubuyobozi bw’akarere n’abafatanyabikorwa bako bibumbiye muri JADF-Jyambere Nyamasheke, igamije guhuza igenamigambi ry’abafatanyabikorwa n’iry’akarere mu rwego rwo kunoza imikorere n’imikoranire itanga umusaruro ku mibereho myiza n’iterambere ry’umuturage. 

Iyi nama yafunguwe ku mugaragaro na Bwana Muhayeyezu Joseph Désiré, umuyobozi w’akarere wungirije ushinzwe iterambere ry’ubukungu, aho yashimangiye akamaro k’iyi nama mu guhuza imbaraga n’igenamigambi hagati y’akarere n’abafatanyabikorwa bako mu rwego rwo kwihutisha ibikorwa by’ingenzi byateganyijwe mu mwaka w’ingengo y’imari wa 2025-2026 hagamijwe kuzamura imibereho myiza y’abaturage n’iterambere ry’akarere muri rusange. 

Ibikorwa by’iyi nama byibanze ku kugaragarizwa imiterere y’ibikorwa by’akarere cyane cyane ibigirwamo uruhare n’abafatanyabikorwa birimo ibijyanye n’ibibazo bibangamiye abaturage, (human security issues) nk’imirire mibi, isuku, kubakira abatishoboye, imibereho myiza n’ibindi. Harebwe kandi igenamigambi ry’abafatanyabikorwa b’akarere mu rwego rwo kurijyanisha n’iry’akarere cyane cyane hashingiwe ku bisanzwe bikorwa na buri mufatanyabikorwa. 

Abafatanyabikorwa b’akarere bafite uruhare runini mu mibereho myiza n’iterambere ry’akarere, bityo inama nk’iyi ikaba yitezweho kuzamura ibipimo by’ibikorwa by’akarere n’abafatanyabikorwa bako kandi bikazabasha gutanga umusaruro ugaragara ku baturage b’akarere n’iterambere ryako muri rusange.