Kuri uyu wa 25 Kanama 2025, mu karere ka Nyamasheke hatangijwe ku mugaragaro imurikabikorwa n’imurikagurisha bizamara icyumweru. Iki gikorwa kiri kubera ku kibuga cy'umupira cya Kirambo mu murenge wa Nyamasheke. Uyu muhango wayobowe n’Umuyobozi w’Akarere wungirije ushinzwe iterambere ry’ubukungu, Bwana Muhayeyezu Joseph Désiré, afatanyije n’intumwa y’Intara y’Iburengerazuba, Bwana Rukundo N. Emmanuel, ushinzwe iterambere ry’uturere.

Iki gikorwa cyitabiriwe n’abafatanyabikorwa batandukanye b’akarere bahuruye mubihuriro JADF Jyambere Nyamasheke, abashoramari, abanyabukorikori n'ubugeni n'abandi. Mu muhango wo gutangiza ku mugaragaro iki gikorwa kandi hari hari Ingabo n'inzego z'umutekano n'abandi bayobozi. Abafatanyabikorwa bitabiriye imurikabikorwa bose berekanye ibikorwa byabo bifasha mu iterambere ry’akarere no guteza imbere imibereho y’abaturage.

Mu gihe cy’iminsi ibiri, abitabiriye imurikagurisha n'imurikabikorwa bazasura ibikorwa bitandukanye by'abafatanyabikorwa b'akarere kandi basobanurirwe serivisi zinyuranye zitangwa mu rwego rwo guteza imbere akarere n'abaturage muri rusange. Hazanabaho n’ibiganiro bigamije gushishikariza urubyiruko n’abagore kwitabira ibikorwa by’ishoramari n’ubucuruzi.

Abayobozi bafashe ijambo bashimangiye ko iri murikabikorwa ari uburyo bwo guhuza imbaraga z’abafatanyabikorwa, gusangira ubunararibonye no gushakira hamwe ibisubizo bigamije iterambere ry’umuturage wa Nyamasheke.