Igicamunsi cy'uwa 14 Ukwakira 2025 cyaranzwe n’ibiganiro hagati y’ubuyobozi bw’Akarere ka Nyamasheke, ubw'inzego z'ibanze n’abaturage mu mirenge yose uko ari 15, binyuze mu Inteko z’Abaturage.
Izi nteko zigamije kunoza imikoranire hagati y’ubuyobozi n’abaturage, gusangira amakuru ku bikorwa by’iterambere, no gukemura ibibazo bitandukanye bigenda bigaragara hirya no hino mu mirenge n'utugari.

Mu murenge wa Kanjongo na Cyato, Umuyobozi w’Akarere ka Nyamasheke, Bwana Mupenzi Narcisse, yifatanyije n’abaturage bo mu tugari twa Susa na Raro, ndetse na bamwe bo mu murenge wa Cyato baganira ku ngingo zinyuranye zirimo Ubumwe n'ubudaheranwa, Uruhare rw'umuturage mu igenamigambi n'ingengo y'imari by'akarere, hanagarukwa ku kibazo cy'ubutaka bamwe mu baturage bari bafitanye n'uruganda rw'icyayi rwa Cyato, aho ubutaka bwabo bwabaruwe kuri urwo ruganda. 

Kuri iki kibazo aho abaturage bagera kuri 320 bari bamaze iminsi bategereje kubona ibyangombwa by’ubutaka bwabo, aho bwagombaga gukurwa ku mazina y'uruganda bukabandikwaho, ubuyobozi bw’Akarere bufatanyije n’inzego bireba na serivisi z'ubutaka bwagaragaje ko abagera kuri 252 bamaze kwandikwaho ubutaka bwabo. 

Abaturage bacyumva iyi nkuru bayakiranye ibyishimo kandi bashimira inzego z'ubuyobozi zumvise ikibazo cyabo zikagishyiramo ubushake mu rwego rwo kugishakira igisubizo. 

Ubuyobozi bw’Akarere bwizeje abasigaye 68 ko nabo bazandikwaho ubutaka bwabo mu gihe kidatinze, hagamijwe kurangiza burundu icyo kibazo cyari kimaze igihe kinini.
Mu ijambo rye, Bwana Mupenzi Narcisse yashimye abaturage ku kwihangana no gukomeza kugirira icyizere ubuyobozi, anabizeza ko gahunda yo gukemura ibibazo by’ubutaka izakomeza gushyirwamo imbaraga kugeza igihe umuturage wese azaba afite icyangombwa cy’ubutaka cye mu buryo bwemewe n’amategeko.

Abaturage kandi bahawe umwanya basangira ijambo n'ubuyobozi aho batanze ibitekerezo binyuranye kandi bakabaza ibibazo ubuyobozi bw'akarere. Ibibazo byabajijwe byahawe umurongo n'umuyobozi w'akarere afatanyije n'ubuyobozi bw'umurenge n'utugari twari mu nteko y'abaturage.