Kuri uyu wa Gatatu, tariki ya 6 Kanama 2025, ubuyobozi bw’Akarere ka Nyamasheke bwatangije inama yahuje abayobozi b’ibigo by’ubuvuzi bikorera muri aka karere, mu rwego rwo gusesengura ishusho y’ibipimo by’ubuvuzi mu mwaka w’imihigo ushize, no gutegura neza ibikorwa bigamije kurushaho kuzamura ibipimo by’ubuvuzi mu mwaka utaha wa 2025–2026.

Iyi nama yafunguwe ku mugaragaro na Bwana Muhayeyezu Joseph Desire, umuyobozi w’akarere wungirije ushinzwe iterambere ry’ubukungu, ikaba yaritabiriwe n’Abayobozi Bakuru b’ibitaro by’intara bya Bushenge n’Ibitaro byo ku rwego rwa kabiri byigisha bya Kibogora (Kibogora Level Two Teaching Hospital), abayobozi b’ibigo nderabuzima (Health Centers), hamwe n’abashinzwe igenamigambi n’isuzumabikorwa baturutse mu bitaro byombi. 

Abitabiriye iyi nama bagaragarijwe imihigo akarera kari gafite mu mwaka ushize n’uko ibipimo by’ubuvuzi byari bihagaze, basuzuma ibyuho byabonetse, banasuzuma ingamba zifatika zafatwa mu kubikosora no kugera ku ntego nshya z’imihigo 2025–2026. 

Nyuma yo gusuzuma uko umwaka ushize wagenze n’ahagiye hagaragara ibyuho, abitabiriye inama biyemeje gukorera hamwe no kongera imbaraga hagamijwe gukosorwa ibitaragenze neza mu mwaka ushize kugira ngo ibipimo by’ubuvuzi mu mwaka wa 2025-2026 bizabe bijyanye n’imihogo y’akarere.