Nk’uko byateguwe na Minisiteri y’Ubutabera, mu Nteko z’Abaturage zo kuri uyu wa kabiri tariki ya 22/01/2019, hirya no hino mu tugari hatangirijwe icyumweru cyahariwe Gutanga Ubufasha mu by'Amategeko ku nsanganyamatsiko igira iti "Rangiza inshingano zawe ushyira mu ibyemezo by'inkiko" cyatangiye ku wa 21-25/01/2019. Mu Karere ka Nyamasheke Ibikorwa byo gutangiza iki cyumweru byakorewe mu Mirenge yose aho Abayobozi, Intumwa za Minisiteri y'Ubutabera hamwe n'inzego z'Umutekano bifatanyije n'abaturage. Ku rwego rw’Akarere cyatangirijwe mu Murenge wa Karengera Akagari ka Mwezi aho Umuyobozi w'Akarere Kamali Aimé Fabien ari kumwe n' Umuyobozi w'Itorero ry'Igihugu Bamporiki Edouald nk'Intumwa ya Minisiteri y' Ubutegetsi bw'Igihugu, Inzego z'Umutekano n'Umuhuzabikorwa w’Inzu y’Ubufasha mu by’Amategeko “MAJ” Nyirahakuzimana Colette mu Karere bafatanyije n'Abaturage. Nyuma yo gusobanurirwa ibikubiye mu Mategeko, Umuyobozi w'Itorero ry'Igihugu Bamporiki Edouald wari n’Umushyitsi Mukuru kuri uyu munsi yaganiriye n’Abaturage maze abasaba kwimakaza umuco w’Urukundo kuko utuma badasiragira mu manza bakiteza imbere. Yasabye kandi abaturage kutirengagiza ibikubiye mu mateko kuko aba yarashyiriweho kuibahirizwa no korohereza Igihugu kugera ku ntego cyihaye. Bamporiki yagarutse cyane ku ngingo yo kwandikisha abana bavuka no kwandukuza abapfuye, kugira ngo bijye bishingirwaho mu igenamigambi ry’Igihugu. Ati “iyo utandikishije umwana wabyaye, Igihugu ntikibasha kumenya abaturage bacyo bityo ntikibashe no kubateganyiriza. Urugero natanga ni nk’amashuri twubaka, inking zihabwa abana n’ibindi, ibyo byose iyo tubikoze hatitawe ku mibare nyayo, turibeshya ugasanga hari abo tutabaze bityo bimwe twateguye ntibibashe kubakwira hakabaho gusaranganya biturutse gusa kuri wowe utandikishije umwana”. Umuyobozi w’Itorero ry’Igihugu yanakomoje ku itegeko ry’ icuruzwa n'ikoreshwa ibiyobyabwenge, yibutsa abantu ko nta terambere ry’Igihugu wategereza ku muntu wayobye ubwenge; abasaba kubigendera kure. Yanasobanuye itegeko ryo kurwanya icuruzwa by'abantu, uburyo bwo gutanga ubufasha mu by'amategeko, ibyerekeranye n'irangizwa ry imanza. Nyuma y’ibiganiro abaturage bahawe umwanya babaza ibibazo bifitanye isano n’amategeko, Ubuyobozi bufata umwanya wo kubyumva no kubisesengura, ibidahawe ibisubizo muri ako kanya bihabwa umurongo n’igihe bizasubirizwa. Muri iki cyumweru cyatangiye ku wa 21 kikazasozwa ku wa 25 Mutarama 2019 Abanayamategeko b’Akarere hamwe n’Intumwa za Minisiteri y’Ubutabera bazagera hirya no hino mu mirenge basobanurire Abaturage amategeko banabafashe kurangiza imanza cyane cyane zirangizwa ku neza.