Umushinga w'ubworozi bw'amafi mu kiyaga cya Kivu “Kivu Choice” watangije ku mugaragaro kareremba za mbere mu Rwanda mu bunini. Izi kareremba zifite ubushobozi bwo gutanga umusaruro w'amafi ugera kuri toni 4000 buri mwaka kuri kareremba imwe, zifite akarambararo ka metero 30 zikaba ari zo nini mu mateka y'ubworozi bw'amafi mu Rwanda.

Uyu mushinga wa “Kivu Choice” w'ubworozi bw'amafi mu karere ka Nyamasheke ukorera mu murenge wa Kagano mu kagari ka Ninzi mu mudugudu wa Gikuyu. 

Umuyobozi w'akarere wungirije Bwana Muhayeyezu Joseph Desiré wari witabiriye uyu muhango ku rwego rw'akarere yavuze ko akarere kishimira gukorana n'umushoramari nka Kivu Choice kuko ari umushoramari munini mu ntara y'Iburengerazuba no mu karere ka Nyamasheke muri rusange. Abazwa ku mpinduka Kivu Choice yazanye mu buzima bw'akarere, yavuze ko Kivu Choice yatanze akazi kuri benshi mu baturage bikabasha kubafasha kwiteza imbere, agaragaza kandi ko Kivu choice yagejeje umusaruro w'amafi ku isoko aho bafite ahacururizwa amafi ku Rwesero no mu isantire ya Tyazo kandi akarere kakaba kazakomeza gukorana nabo kugira ngo hafungurwe n'ahandi hacururizwa amafi mu bice bitandukanye by'akarere. Yagaragaje kandi ko kubera Kivu Choice n'ibikorwa bindi by'ishoramari byazamutse aho abubaka amazu y'amacumbi biyongereye ndetse n'ubucuruzi bukarushaho gutera imbere, n'ibindi. 

Iki gikorwa kandi cyitabiriwe n'abayobozi mu nzego zinyuranye harimo ubuyobozi bw'ingabo mu karere ka Nyamasheke, umuyobozi mukuru muri Minisiteri y'ubuhinzi n'ubworozi Bwana Jean Claude Ndorimana n'umuyobozi mukuru wungirije mu kigo cy'igihugu gishinzwe itarambere cy'ubuhinzi n'ubworozi (RAB) Dr. Solange Uwituze. 

Bwana Jean Claude Ndorimana wari umushyitsi mukuru muri uyu muhango ashima intambwe ishimishije Kivu Choice imaze gutera mu musaruro w'amafi, akavuga ko akurikije intego igihugu gifite yo kubona umusaruro w'amafi ugera kuri Toni ibihumbi 80 ku mwaka muri 2035, abashoramari nka Kivu Choice n'abandi bazagira uruhare rugaragara mu kugera kuri iyo ntego. Yamaze kandi impungenge abashoramari bifuza gukora ubworozi bw'amafi kuko ikiyaga cya Kivu ari kinini kandi ibijyanye n'amaturagiro n'ibiryo by'amafi bikaba bitakiri ikibazo mu Rwanda. 

Umuyobozi wa Kivu Choice akaba n'uwayitangije Bwana Kamran Ahmad avuga ko umushinga wabo ufite ubushobozi bwo gusarura toni 18 z'amafi ku munsi, bakaba bafite intego yo gukomeza kuzamura uyu musaruro kugeza kuri toni 60 ku munsi mu mwaka wa 2026 ari nako bagura uduce bacuruzamo umusaruro wabo. 

Bwana Kamran Ahmad ubwo yasobanuriraga abayobozi iby'ubworozi bw'amafi mu kiyaga cya Kivu

Bwana Jean Claude Ndorimana Umuyobozi mukuru muri Minisiteri y'ubuhinzi n'ubworozi ageza ijambo ku bitabiriye igikorwa