Mu kwibuka ku nshuro ya 31 Jenoside yakorewe abatutsi mu 1994 kuri uyu wa 12 Gicurasi 2025 mu bitaro by'intara bya Bushenge, by'umwihariko ahibukwaga abahoze ari abakozi, abarwayi, abarwaza n'abandi bari bahungiye mu bitaro bakahicirwa muri Jenoside kandi hari abaganga babigizemo uruhare, umuyobozi w'akarere ka Nyamasheke Bwana Mupenzi Narcisse  yagaye abaganga bijanditse mu bwicanyi bwa jenoside yakorewe abatutsi, bakica abari abakiliya b'ibitaro/babo ndetse bikanarenga bakica bagenzi babo b'abaganga, kandi mu mwuga barahirira kuzasigasira ubuzima bw'ababagana.  Ati:" ibi bigaragaza ubukana jenoside yakoranywe kandi bikaba byaturutse ku icengezamatwara ry'ingengabitekerezo ya Jenoside yari yaramunze ubutegetsi bwateguye kandi bugashyira mu bikorwa jenoside. 

Yasabye urubyiruko kurebera ku bahoze ari ingabo za RPA kuko aho igihugu kigeze ari ubwitange bwaranze izo ngabo zari urubyiruko rwifitemo urukundo rw'igihugu n'ubumwe bw'abanyarwanda. Ati: “Ubwo bumwe ni bwo bwashyizwe imbere mu kongera kubaka igihugu nyuma ya Jenoside yakorewe abatutsi. Kuba tubona urubyiruko hano biraduha icyizere ariko twibaza uko byagenze kugira ngo uyu munsi mube mubasha gukora akazi mu mutekano? Byavuye mu ngufu n'amaraso y'ababiharaniye. Urubyiruko rukwiye kureba imbere kandi rukumva ko rufite inshingano zo kongera kubaka umwuga w'ubuganga n'indi myuga bijyana, kugira ngo ntituzongere kumva amateka ya jenoside nk'ayo dusanga hirya no hino mu bitaro n'ibigo by'ubuvuzi byakorewemo Jenosode." 

"Twibuke twiyubaka!"