Ubwo hizihizwaga umunsi mpuzamahanga wa Mwarimu, aganira n' Abarezi mu Murenge wa Kanjongo, Umuyobozi w’ Akarere ka Nyamasheke Mupenzi Narcisse yikije ku kamaro ntagereranywa ka mwarimu n’ imvune iri muri uyu mwuga ariko anibutsa ko bitarangirira mu kwigisha amasomo yo mu nteganyanyigisho gusa ahubwo ko mwarimu akwiye kuba icyitegererezo ku bamuca imbere bose mu migirire ye ya buri munsi.

Yagize ati”Kwigisha uha abana ubumenyi ni byiza ndetse cyane kuko abakomeye bose baciye mu maboko ya mwarimu yewe na mwarimu ubwe ni mwarimu kuko yanyuze imbere ya mwarimu, ariko kwigisha gusa ntibihagije ahubwo ukwiye kuzirikana ko abo bose bakunyura imbere bagufataho urugero kandi rukwiye kuba rwiza”.

Umuyobozi w’ Akarere yibukije abarezi ko bababonamo abafatanyabikorwa bakomeye muri gahunda zitandukanye kubera iyo shusho bafite muri kominote. Yabasabye ubufatanye muri byose kugira ngo iterambere ryifuzwa rigerweho.

“Nabarebye mbona murasa neza rwose bitandukanye n’ uko mu bihe bishize umwarimu yafatwaga, ku buryo ibintu byose bicirirtse bamufatiragaho urugero, birashimishije; rero mwarimu usa neza atya ntiyakwigisha umwana usa nabi, ntiyakwigisha urwaye bwaki cyangwa wagwingiye,..” Umuyobozi w' Akarere.

Abarimu bashima Leta y’ u Rwanda uburyo yakomeje kubazirikana muri byose kugira ngo uyu mwuga wabo bawukore bishimye kandi batanga umusaruro bitezweho banizeza Umuyobozi w’ Akarere mushya ubufatanye muri byose nk’ uko yabibasabye.