Ku wa 13 Gicurasi 2025 abakozi b'akarere bahuguwe ku gukumira no kurwanya inkongi z'umuriro. Aya mahugurwa yatanzwe n'ishami rya Polisi rishinzwe kurwanya, gukumira inkongi z'umuriro no gutanga ubundi butabazi rizwi mu ndimi z'amahanga nka “Fire and rescue brigade”. 

Muri aya mahugurwa yari yitabiriwe n'abakozi bakorera ku biro by'akarere mu byiciro byabo binyuranye, hatanzwe inyigisho ku bintu bitatu by'ingenzi bituma hashobora kubaho inkongi z'umuriro ari byo ubushyuhe (heat), igishya (fuel) n'umwuka wa “Oxygen”, basobanurirwa ko iyo kimwe kibuze muri ibyo bitatu biba bidashoboka ko habaho inkongi z'umuriro. 

Mu buryo bwo guhangana n'inkongi z'umuriro kandi, abahuguwe basobanuriwe ko inkongi y'umuriro irwanywa hashingiwe ku bwoko bw'igishya, bityo hakaba hagomba kwifashishwa ibikoresho byabugenewe mu guhangana n'inkongi. 

Muri rwego rwo kumenya neza uburyo bwo guhangana n'inkongi z'umuriro bitewe n'ubwoko bw'igishya, amahugurwa yari agizwe n'ibyiciro bibiri aho abahugurwa babanje gukurikira isomo ku kurwanya no gukumira inkongi z'umuriro “fire fighting theory”, igice cya kabiri cy'amahugurwa kikaba cyari icyo gushyira mu bikorwa ibyo bigishijwe hacanwa umuriro hakanakoreshwa uburyo bwabugenewe mu guhangana/kuzimya uwo muriro “practical fire fighting”.