Ku wa 07 Mata aba ari umunsi u Rwanda rwibuka Jenoside yakorewe Abatutsi mu 1994.

Ku rwego rw'Akarere ka Nyamasheke, icyumweru cy'icyunamo ndetse n' minsi 100 yo Kwibuka byatangirijwe mu Murenge wa Macuba, Akagari ka Rugari Umudugudu wa Matyazo ku Rwibutso rwa Jenoside rwa Hanika ruruhukiyemo abantu 8236 biganjemo abaguye kuri Kiriziya Gaturika ya Hanika n'abandi bavanywe hirya no hino mu byahoze ari Komini Gatare, Rwamatamu mu cyahoze ari Kibuye ndetse na bamwe bo mu cyari Kirambo.

Umunyamabanga Nshingwabikorwa w'Intara y'Iburengerazuba  yongeye gusaba abitabiriye kutabiba urwango mu bana bato bakibyiruka no kubarinda ingengabitekerezo mbi kuko ari yo yaganishije u Rwanda mu icuraburindi rya jenoside yakorewe Abatutsi. Yasabye ko abantu bakwimika urukundo aho kubiba amacakubiri.

Habiyaremye yanakomoje ku bantu bakigaragarwaho n’Ingengabitekerezo ya jenoside avuga ko abona ari ibintu bidakwiye kugira umwanya mu mitima y’Abanyarwanda kuko nta soko igihari yo kuyivomaho.ati” ese koko ko abenshi mu bakoze jenoside bavuga ko bashutswe na Leta mbi, abakigaza Ingengabitekerezo ya jenoside ubu bashukwa n’iyihe Leta? Abantu bareke ibintu bidafite agaciro, dufatanye kubaka Igihugu”.

Perezida w'Umuryango IBUKA mu Karere Bagirishya Jean Marie Vianney yashimiye Leta uburyo yakomeje guherekeza abarokotse Jenoside muri iyi myaka 25 ishize bakaba bafatanyije n'abandi kubaka u Rwanda.