Kuri uyu wa 16 Nyakanga 2025, Meya Mupenzi Narcisse yakiriye abadepite, Hon. Kayigire Terence na Hon. Sibobugingo Gloriose bagize Komisiyo y'Ubumwe bw'Abanyarwanda, Uburenganzira bwa Muntu no Kurwanya Jenoside baganira ku ngingo zinyuranye zirimo kurwanya jenoside n'ingengabitekerezo yayo, gahunda za Guverinoma (NST 2) harebwa ibyakozwe n'ibindi bitarakorwa bikeneye ubuvugizi. 

Ubuyobozi bw'akarere bwagaragarije abadepite ko mu rwego rwo kurwanya ingengabitekerezo ya Jenoside, ubuyobozi bw’ Akarere bwifashisha Inteko z’ Abaturage, abaturage bagasobanurirwa  Itegeko rihana Ingengabitekerezo ya Jenoside; mu karere kandi abaturage bose bakaba bitabira gahunda yo kwibuka Jenoside yakorewe Abatutsi, bagahabwa Ibiganiro mu Ihuriro ry’ Ubumwe n’ Ubwiyunge;

Bagaragaje kandi ko abafungiye icyaha cya Jenoside yakorewe Abatutsi mu 1994 bahuzwa n’abo bakoreye icyaha mu rugendo rw’ Isanamitima bagasaba imbabazi, bakababarirwa nk’ uburyo bwo komora ibikomere no kongera kubanisha abanyarwanda hakaba kandi hakorwa ibiganiro bya Ndi Umunyarwanda byitabirwa n’ abaturage b’ ibyiciro bitandukanye.

Hagarutswe kandi ku ruhare rw'urubyiruko mu guteza imbere ubumwe n'ubwiyunge. Abahagarariye urubyiruko bavuga ko bagira uruhare mu guhugura urundi rubyiruko mu mikoreshereze inoze y’imbuga nkoranyambaga mu kurwanya ingengabitekerezo ya Jenoside binyuze muri gahunda ya "Intore mu ikoranabuhanga”.