Kuri uyu wa 04 Nyakanga 2025 ubwo u Rwanda rwizihizaga isabukuru y'imyaka 31 yo kwibohora, mu karere ka Nyamasheke ibirori byo kwizihiza isabujuru yo kwibohora ku nshuro ya 31 byabereye mu midugudu yose igize akarere. 

Ubuyobozi bw'akarere bwifatanyije n'abaturage bo mu murenge wa Kanjongo mu kagari ka Kibogora, umudugudu wa Nyagacaca. 

Umunyamabanga Nshingwabikorwa w'umurenge wa Kanjongo Bwana Cyimana K. Juvenal yashimiye ubuyobozi bw'akarere kuba bwaje kwifatanya n'abaturage bo muri uyu murenge, ashima kandi gahunda zinyuranye z'iterambere akarere gafashamo uyu murenge. 

Yagaragaje ko mu rugendo rwo kwibohora umurenge wa Kanjongo wakataje muri gahunda zinyuranye za Leta, by'umwihariko agaragaza isantire ya Tyazo nk'ikimenyetso gishimangira ko kwibohora nyako bigaragarira muri ibyo bikorwa by'iterambere. 

Umuturage watanze ubuhamya ku byo yigejejeho mu rugendo rwo kwibohora mu iterambere Bwana  Nderekanye Dominique yavuze ko yujuje inyubako y'igorofa mu isantire ya Tyazo kandi we n'abandi bashoramari bakaba bakomeje intambwe ijya mbere mu rugamba rw'iterambere. 

Umuyobozi w'akarere ka Nyamasheke Bwana Mupenzi Narcisse yashimiye abaturage n'abandi bashyitsi bitabiriye ibi birori, ashimira ingabo zahoze ari iza RPA zabohoye u Rwanda zikanahagarika jenoside yakorerwaga abatutsi zirangajwe imbere na Nyakubahwa Perezida wa Repubulika Paul Kagame.

Yasabye abaturage kutirara ngo bumve ko urugendo rwo kwibohora rwarangiye, abasaba gukomeza gukora cyane no kwigira ku bakoze ibikorwa by'indashyikirwa kugira ngo bakomeze gutanga umusanzu mu iterambere ry'igihugu by'umwihariko akarere ka Nyamasheke.