Bwana Mupennzi Narcisse ubwo yaganiraga n’abaturage b’umurenge wa Mahembe mu kagari ka Kagarama umudugudu wa Gabiro, yijeje abacururiza mu isantire ya Mugonero ko ikibazo cy’isoko nyambukiranyamipaka rya Mugonero akarere kakizi, kandi kakaba kari gukorana n’inzego bireba kugira ngo iri soko ryongere rifungure. 

Asobanura ikibazo cyatumye iri soko rifungwa yavuze ko amwe mu masoko nyambukiranyamipaka mu karere yabaye afunzwe kugira ngo habanze gushyirwaho uburyo buhamye bwo kuyakurikirana cyane cyane mu rwego rwo kumenya neza ibyinjiye n’ibyasohotse mu gihugu.

Yababwiye ko akarere kari gukorana n’ikigo cy’igihugu cy’imisoro n’amahoro “Rwanda Revenue Authority”, kugira ngo hashakwe abakozi b’iki kigo bazajya bakurikirana imikorere y’aya masoko mu rwego rwo gukurikiza imikorere iranga amasoko nyambukiranyamipaka. Kuri ubu, isoko nyambukiranyamipaka rya Rugari ni ryo riri gukora neza nyuma y’aho ritangiye gukurikiranwa n’abakozi b’ikigo cy’igihugu cy'imisoro n'amahoro, n'andi masoko hakaba hateganywa ko yacungwa mu buryo bumwe. 

Umuyobozi w’akarere kandi yashishikarije abitabiriye inteko y’abaturage kurushaho kunoza isuku ku mubiri no mu ngo zabo, by’umwihariko abasaba kugira ubwiherero bwujuje ibisabwa. Yasabye kandi abacuruzi cyane cyane abafite utubari n’abacuruza ibyo kurya muri rusange, kugira isuku no kwirinda urugomo mu tubari, by’umwihariko asaba abafite utubari kwita ku mutekano watwo, kuko akabari kazagaragaramo ibibazo by’umutekano muke kazafungwa. 

Yasoje asaba abitabiriye inteko gukomeza gusigasira ubumwe bw’abanyarwanda birinda icyo ari cyo cyose cyaganisha ku macakubiri n’ingengabitekerezo ya jenoside. Yakanguriye abafunguwe bari barahamijwe ibyaha bya jenoside yakorewe abatutsi kwitabira inteko z’abaturage kuko ari urubuga rubafasha gukira ipfunwe, kwisanga mu muryango nyarwanda no kwiyunga by’ukuri n’abo bahemukiye.