Minisitiri w’Ubumwe bw’Abanyarwanda n’Inshingano mboneragihugu Hon.Dr BIZIMANA Jean Damascene akaba n’imboni ya Guverinoma y’Akarere ka Nyamasheke yifatanyije n’aka karere mu Kwibuka30 Jenoside yakorewe abatutsi  1994 mu karere ka Nyamasheke mu mirenge ya Ruharambuga na Bushenge ndetse n’Umurenge wa Giheke wo mu Karere ka Rusizi.

Ni igikorwa cyitabiriwe n’abayobozi mu nzego zitandukanye ndetse n’abaturage batuye iyo mirenge.

Mu kiganiro cye, yerekanye irondabwoko rya Leta ryimitswe n’Abakoloni na PARMEHUTU, uko byakozwe muri Cyangugu hagati ya 1960-1963 ubwo muri Cyangugu hishwe Abatutsi kuri Noheli i Mururu, Kamembe, Nyamasheke, Shangi, Mibilizi n’ahandi benshi muri bo bakicirwa muri Nyungwe. Yerekanye ubutwari bwa Padiri Henri Bazot wabaga i Nyamasheke mu kubatabariza no kwamagana uruhare rwa Perefe Pascal Ngirabatware n’abandi bategetsi ba Cyangugu.

Yasobanuye itegurwa n’ikorwa rya Jenoside muri Cyangugu hifashishijwe icyiswe “défense civile” y’abanya-Cyangugu barangajwe imbere na Perefe Emmanuel Bagambiki, abayobozi b’inganda za CIMERWA Marcel Sebatware, urwa Shagasha, Sonafruits.

Yagaragaje kandi uruhare rw’abasirikare, jandarumori, n’Interahamwe nkuru zirimo Yussuf Munyakazi, Edouard Bandetse, Bareberaho Bantari Ripa, Sewabeza Jean Pierre, Gerard Terebura, Theodore Munyangabe, Emmanuel Kamonyo n’abandi, muri iyo “défense civile”.Yerekanye imiterere y’ipfobya rya Jenoside n’ibikorwa bibi bigamije kuyobya abaturage bikwizwa n’abakomeje kwimika ingengabitekerezo ya jenoside, asaba abaturage kuba maso bagakomeza kwizera ubuyobozi bwabo no kwirinda icyabatanya tugakomeza twese kubaka u Rwanda rwa twese.