Mu rwego rwo kwimakaza Ubumwe n’Ubudaheranwa bw’Abanyarwanda, Meya w’Akarere ka Nyamasheke, Bwana Mupenzi Narcisse, yatangaje ikiganiro ku bagororwa bahamwe n’ibyaha bya Jenoside yakorewe Abatutsi bari hafi gusoza ibihano, ku Igororero rya Nyamasheke.

Aba bagororwa bagera kuri 607 baturutse hirya no hino mu magororero y’igihugu bahurijwe ku Igororero rya Nyamasheke kugira ngo bategurwe gusubira mu miryango yabo ndetse n’umuryango nyarwanda muri rusange. Bahabwa ibiganiro binyuranye bigamije kwimakaza Ubumwe n’Ubudaheranwa bw’Abanyarwanda, iyi ikaba ari gahunda yashyizweho na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE). Muri bo harimo 20 bakomoka mu Karere ka Nyamasheke.

Meya Mupenzi mu kiganiro cye yagarutse ku isura y’inzego z’ibanze n’ukuntu zubatse, asobanura icyerekezo cy’igihugu mu rugendo rw’iterambere rirambye, ndetse anagaragaza uburyo serivisi zigezwa ku baturage mu rwego rwo kwegera buri wese.

Yibukije kandi ko ubuyobozi bwegerejwe abaturage ari urufunguzo rwo kwihutisha iterambere no kwimakaza imiyoborere ishingiye ku baturage. Yabasabye ko, mu gihe bazaba barangije ibihano byabo bagasubira mu miryango, bazaba inkingi mu kubaka Ubumwe n’Ubudaheranwa bw’Abanyarwanda, bagafatanya n’abandi mu kubaka igihugu cyunze ubumwe kandi gitera imbere.

Mu gusoza ikiganiro, abagororwa bahawe umwanya wo kubaza ibibazo no kugaragaza ibitekerezo, maze Meya abaha ibisubizo abibutsa ko Ubumwe n’Ubudaheranwa bw’Abanyarwanda ari byo shingiro ry’iterambere ry’igihugu.