Kuri uyu wa 01 Kanama 2025 mu Rwanda hirya no hino mu turere, abaturage bahuriye mu birori byo kwizihiza umunsi mukuru w'umuganura. Mu karere ka Nyamasheke naho uyu munsi wizihijwe hirya no hino mu mirenge, by'umwihariko ubuyobozi bw'akarere bukaba bwifatanyije n'abaturage b'umurenge wa Karambi mu kwizihiza umuganura.

Miri ibi birori abaturage bamurikiye abayobozi umusaruro w'ibyo bagezeho mu bihingwa ngandurarugo n'ibihingwa ngengabukungu, hatangwa n'ubuhamya bunyuranye bw'abaturage bashima Leta y'ubumwe bw'abanyarwanda ko yabafashije kwiteza imbere bakaba bishimira umusaruro w'ibyo bagezeho. 

Mu ijambo rye, umuyobozi w'akarere Bwana Mupenzi Narcisse yashimiye abitabiriye ibi birori na Leta y'ubumwe bw'Abanyarwanda yongeye kugarura umuganura nka kimwe mu birango by'umuco nyarwanda cyari cyarazimiye kubera ubukoloni, avuga ko umuganura ukwiye kuba umwanya wo kwishimira ibyagezweho, abaturage bagasabana kandi bagasangira. 

Agaruka ku gisobanuro cy'umuganura umuyobozi w'akarere yagize ati: “Mu mateka y'u Rwanda umuganura wari umuhango ukomeye ugenga imibereho y'abanyarwanda n'imitegekere y'igihugu, kandi ukaba wari inzira imwe mu nzira 18 z'ubwiru zariho. Wari umuhango watumaga abanyarwanda bahura bakishimira umwero, bakishimira n'umusaruro, ari na yo mpamvu kuri uwo munsi gusangira byabaga ari ngombwa ku banyarwanda. Kubera iyo rero, abatanze ubuhamya bugarabaza ko bageze ku musaruro ushimishije, twizera ko uyu munsi basangira na bagenzi babo bishimira ibyo bagezeho.” 

Ibirori by'umuganura byasojwe n'umuhango wo kuganura ku bayobozi n'abaturage bari babyitabiriye.