Kuri uyu wa 25 Ukwakira 2025, Umunyamabanga wa Leta muri Minisiteri ya Siporo, Bwana Ngarambe Rwego, yifatanyije n’abaturage bo mu Murenge wa Kanjongo, Akagari ka Kigoya, mu gikorwa cy’umuganda rusange usoza ukwezi kwa 10, 2025. 

Iki gikorwa cyitabiriwe n’ubuyobozi bw’Akarere ka Nyamasheke bamwe mu bagize Njyanama y'Akarere barangajwe imbere na Perezida wa Njyanama y’Akarere Prof. Kamana Emmanuel, Ingabo z’u Rwanda (RDF), izindi nzego z’umutekano, n’abaturage baturutse mu kagari ka Kigoya no mu nkengero zako.

Muri uyu muganda, hatewe ibiti bisaga ibihumbi bine (4,000) bivangwa n’imyaka ku buso bwa hegitari 16, mu rwego rwo kubungabunga ubutaka n'ibidukikije muri rusange. Nyuma y'igikorwa cy'umuganda abawitabiriye bapimwe ku bushake indwara zitandura. 

Mu butumwa bwatanzwe, Bwana Ngarambe Rwego na Meya Mupenzi Narcisse bashimiye abaturage ku kwitabira ari benshi babasaba gukomeza kubungabunga ibidukikije batera ibiti. Babakanguriye kandi kugira isuku y'umubiri no mu ngo, kubungabunga umutekano, kubana mu mahoro no gushyira imbaraga mu mikino n’imyidagaduro nk'isoko y'ubuzima buzira umuze.