Kwizihiza umunsi mbonezamikurire ku rwego rw'akarere ka Nyamasheke byabereye mu murenge wa Karambi kuri uyu wa 28 Gicurasi 2025. Ibirori byo kwizihiza uyu munsi byitabiriwe na Bwana Bisengimana Denis ushinzwe imiyoborere myiza mu ntara y'Iburengerazuba akaba yahagarariye guverineri utabashije kuboneka. Hari kandi umuyobozi wakarere ka Nyamasheke wungirije ushinzwe imibereho myiza y'abaturage Madamu Mukankusi Athanasie n'abandi bafatanyabikorwa b'akarere mu guteza imbere imikurire y'umwana AEE Rwanda na Caritas Rwanda. 

Abayobozi bagaragarijwe byinshi byifashishwa muri uyu murenge mu kwita ku mikurire y'umwana, uko imikurire y'umwana ikurikiranwa ku bigo nderabuzima n'uruhare rw'abajyanama b'ubuzima, bikurikirwa no guha abana amata. 

Mu butumwa bwatanzwe n'umushyitsi mukuru n'abandi bafashe umwanya w'ijambo, bakanguriye ababyeyi kwita ku bana kandi bakabajyana mu gahunda y'ingo mbonezamikurire kuko zifasha abana byinshi mu mikurire yabo. Basabye inzego z'ibanze kongera ubukangurambaga ku babyeyi batarashyira abana babo muri gahunda y'ingo mbonezamikurire, babasaba by'umwihariko kubana neza mu miryango birinda amakimbirane kuko agira uruhare mu mibereho mibi y'abana bakagira ibibazo by'imirire mibi n'igwingira. 

By'umwihariko abaturage basabwe kwitabira gahunda zo kuboneza urubyaro mu rwego rwo kubasha kurera neza abana bijyanye n'ubushobozi bafite.